Соңғы уақытта әсіресе, Тараз қаласында өз үйлеріне кіре алмауы салдарынан құтқарушылардың көмегіне жүгінген жағдайлар жиі орын алуда. Оның себептері де әртүрлі болып табылады.
Мысалы, кілтті жоғалтып алу, кілтті үйдің ішінде ұмытып қалдырып кету, кәмелет жасына толмаған балалардың немесе науқас жандардың есігін іштен кілттеп алу жағдайлары, жалғызбасты зейнеткерлердің күтпеген жерден науқастануы салдарынан үй есігін аша алмау жағдайлары және т.б.
Төмендегі орын алған шақыртулар осының куәсі іспетті:
Жамбыл облысы ТЖД Өрт сөндіру және авариялық-құтқару қызметінің Жедел-құтқару жасағының құтқарушылары өздерінің үйлеріне кіре алмаған Тараз қаласының зейнеткер тұрғындарына, яғни 80 жастағы зейнеткердің және 72 жасар зейнеткердің үйлерінің есіктерін ашып берген.
Сондай-ақ құтқарушылар қаладағы көпқабатты тұрғынүйдің пәтерінің бірінде іштен кілттеніп қалып қойған 3 жасар баланы ата-анасына тапсырған.
Мұнан өзге көпқабатты тұрғынүйдің пәтерінде қамалып қалған 2 және 7 жасар балаларға үй есігін ашып берген. Сондай-ақ құтқарушылар психикалық ауытқуы бар ер кісінің үй ішінде кілттеніп қалу жағдайы бойынша шақыртуға да шыққан. Жалпы құтқарушылар мұндай жағдайлардан бөлек полиция қызметімен бірлесе есік ашу жұмыстарына да шығатындығын еске сала кеткен жөн. Ал соңғы үш тәуліктегі шақыртулардың ішіндегі ең ерекшесі көпқабатты тұрғынүйдің пәтеріне жарқанаттың кіріп кетуіне байланысты ұшатын тышқанды сыртқа шығару жұмыстары болды. Бұған дейін құтқарушылар үй ішіне кіріп кеткен жыланды немесе үй қабырғасына қысылып қалған итті шығару жұмыстарымен де айналысқан болатын.
Осыған орай Жамбыл облысы ТЖ департаменті облыс және қала тұрғындарына кәмелет жасына толмаған балаларды және науқас жандарды, сондай-ақ егде жастағы қарт кісілерді қараусыз қалдырмауға шақырады. Ал үйдің есігін өздігінен аша алмаған жағдайда және адам өміріне қауіп төнген кезде 112 шұғыл қызметіне хабарласу қажеттігін ескертеді.
Жамбыл облысы ТЖД Өрт сөндіру және авариялық-құтқару жұмыстары қызметінің
Қоғаммен байланыс тобы
