Табиғатты қорғау мен қоршаған ортаны ластанудан сақтау – бүгінгі күннің ең өзекті мәселелерінің бірі. Әлемде экологиялық мәдениет қалыптасып, қалдықтарды қайта өңдеу ісі басты назарға шыққан заманда тұрмыстық дүниелерді жаңа өнімге айналдыру – табиғатқа көрсетілген ең үлкен қамқорлық. Осындай игі бастаманы өңірімізде жүзеге асырып отырған кәсіпорындардың бірі – Тараз қаласындағы «BBBB Group» жауапкершілігі шектеулі серіктестігі. 2025 жылдың басында өз жұмысын бастаған бұл жас өндіріс орны өңірдегі қайта өңдеу саласына серпін беріп, экологияны қорғау мен тұрақты жұмыс орындарын ашудың озық үлгісін көрсетіп отыр. Бүгінде кәсіпорын 12 маманды жұмыспен қамтып, заманауи технологиялардың күшімен жылына 1200 тонна макулатураны қайта өңдеуде. Нәтижесінде шығарылып жатқан жұмыртқа сақтауға және тасымалдауға арналған сапалы қағаз лотоктар жергілікті құс шаруашылықтары мен кәсіпкерлер арасында үлкен сұранысқа ие.
Кәсіпорын картон қораптар, кітаптар, дәптерлер, кеңсе қағаздары мен газет-журналдарды қабылдап, тұрғындарға ыңғайлы болу үшін өз аумағында және қаладағы пункттер арқылы шикізат жинайды. Дегенмен, өндіріс қарқынын тежеп тұрған басты мәселе – Тараз қаласындағы макулатура тапшылығы. Өндірістік қуатты толық пайдалану үшін шикізаттың бір бөлігін басқа өңірлерден тасымалдауға мәжбүр, бұл өз кезегінде логистикалық шығындарды арттырады. Кәсіпорын директоры Бекмұхан Бегімханұлы атап өткендей, егер тұрғындар мен мекемелер қағаз қалдықтарын бөлек жинап, қабылдау пункттеріне өткізсе, табиғатқа жанашырлық танытып қана қоймай, қайта өңдеу саласының дамуына үлкен қолдау көрсеткен болар еді.
Әрбір қайта өңделген бір тонна макулатура – жүздеген ағаштың кесілуіне жол бермей, полигондардағы тұрмыстық қалдықтардың көлемін азайтатын маңызды қадам. «BBBB Group» тек өндіріспен шектелмей, өңірдегі «жасыл экономиканы» дамытуға және экологиялық мәдениетті қалыптастыруға сүбелі үлес қосып келеді. Алдағы уақытта өндіріс көлемін еселеп, ассортиментті кеңейтуді жоспарлап отырған кәсіпорын тұрғындарды пайдаланылған қағаздарды қоқысқа тастамай, қайта өңдеуге өткізуге шақырады. Себебі қалдықты қайта айналымға енгізу – табиғатты қорғап қана қоймай, өңір экономикасы мен жаңа жұмыс орындарының көбеюіне жол ашатын бірден-бір жол.
