Денсаулық сақтау магистрі, жоғары санатты дәрігер-нейрохирург, Орталық клиникалық ауруханасы нейрохирургия бөлімінің меңгерушісі Мыңжылқы Бердіходжаев Тараз қалалық көпбейінді ауруханасында «Ми тамырларының аневризмасы мен стеноздарын эндоваскулярлық емдеу» тақырыбында шеберлік сыныбын өткізді.
Оған цереброваскулярлық патологияны емдеумен айналысатын нейрохирург-дәрігерлері, рентгенхирургтер, анестезиолог-реаниматологтар, өңірдің неврологтары қатысты. Бұл жиын оларды қызықтыратын мәселелерді егжей-тегжейлі талқылауға және тәжірибе алмасуға мүмкіндік берді.
М.Бердіходжаев атап өткендей, нейрохирургиядағы рентгенэндоваскулярлық операция – тігістерді салуды талап етпейтін, тыртықтар қалмайтын, жұқтыру қаупі аз, анатомиялық құрылымдардың тұтастығы, пациенттерді тез қалпына келтіру және ашық операциялардың кейбір түрлерімен салыстырғанда жоғары нәтижесі сақталатын шағын инвазивті рәсім.
Шеберлік сыныбы аясында ми тамырларының күрделі патологиялары және ұйқы артерияларының стеноздары бар пациенттерде барлығы алты көрсетілімдік операция жасалды. Оталар асқынусыз сәтті өтті. Хирургиялық араласу жасалған пациенттердің жағдайы қанағаттанарлық және олар шығаруға дайындалуда.
Іс-шараға қатысушылар рентгенэндоваскулярлық операциялар жүргізудегі тәжірибесі және науқастарды емдеуге қолдау көрсеткені үшін хирург Мыңжылқы Бердіходжаевқа алғыс білдірді. Бұдан әрі осы операция осы мекемеде медициналық сақтандыру және тегін көмектің кепілді көлемі шеңберінде тегін жүргізілетін болады.
Өңірлік коммуникациялар қызметі
