Бүгін қаламыздағы жақында ғана ашылған «New York coffe» дәмханасында кезекті Саналы TALKS интеллектуалды кеші өтті. «Sana» оқыту орталығының ұйымдастыруымен осымен бесінші рет өткізіліп отырған қызықты шараның тақырыбы «Homo sapiens»– XXI ғасырда» болды.
Саналы адамның өмір сүру сапасы хақында өрбіген өнегелі кешке облысымызға белгілі тұлғалар қатысты. Олардың қатарында жуырда ғана ашылған «Астана PARK» кинотеатрының директоры, бизнесмен Олжас Қуандықов, М.Х.Дулати атындағы ТарМУ студенттік кәсіподақ ұйымының төрағасы Файзулла Сағымбаев, қаламыздағы «Изюм» дәмді палау орталығының негізін қалаушы, ресторатор және полиглот Алихан Айтбаев, Саналы TALKS жобасының идея авторы Ерғали Әбуғали сынды азаматтар спикер ретінде сөз алып, қонақтарға бизнес, тайм медежмент, даму, ұлттық құндылықтар турасындағы мәнді де мағыналы ойларын ортаға салды.
Әлемге белгілі TEDx форматында өткен креативті кештің соңында ұйымдастырушыларға қашанда қолдау көрсетіп, жол сілтеп жүрген Жамбыл облыстық «Жас Отан» жастар қанатының басшысы Уалихан Болатбек сөз алып, мұндай шараның маңыздылығы туралы баяндады.
Алғаш рет ақылы түрде өткен шараның соңында көрермен жастарға фуршет дастарханы жайылып, қонақтар ұйымдастырушыларға ризашыылығын айтып, естелік фотоға түсті.
Арайлы Жақсылық
