Съезге тамыр хирургтары, травматологтар, урологтар, проктологтар, балалар хирургтары, сондай-ақ аудандық деңгейдегі медициналық ұйымдарда қызмет ететін тәжірибелі дәрігерлер қатысты. Кездесу барысында қазіргі хирургия саласындағы өзекті мәселелер жан-жақты талқыланып, озық тәсілдер мен тиімді практикалар ортаға салынды.
Бағдарлама мазмұн жағынан бай әрі тәжірибеге бағытталған сипатымен ерекшеленді. Қатысушылар клиникалық тұрғыдан маңызды тақырыптарды кеңінен қамтып, жаңа технологиялардың мүмкіндіктерін пайдалану арқылы несеп-тас ауруын емдеудің заманауи әдістерін талқылады. Сонымен қатар жарақаттар кезінде аз инвазивті хирургияны дамыту мәселесі де назардан тыс қалмады.
Әлеуметтік маңызы жоғары дерттердің бірі – бауыр эхинококкозына ерекше көңіл бөлінді. Мамандар бұл ауруды ерте анықтау жолдары мен хирургиялық емдеудің тиімді тәсілдерін саралап, нақты тәжірибелік ұсыныстарын ұсынды. Тамыр хирургиясына қатысты күрделі мәселелер де қызу пікірталас тудырды. Әсіресе кеуде және құрсақ аортасының аневризмасын анықтау мен емдеудің жаңа әдістері кеңінен сөз болды. Бұл бағытта жоғары технологиялар мен мультидисциплинарлық тәсілдің маңызы ерекше екені атап өтілді.
Бұдан бөлек, шажырқай тамырлары тромбозының диагностикасы мен емі, сондай-ақ парапроктит және оның асқынуларын басқару мәселелері де талқыланды.
Жиын қорытындысында облыстың штаттан тыс бас хирургы Нұрлан Жайымбаев сөз сөйлеп, хирургиялық қызметтің қазіргі жағдайына кешенді баға берді. Ол саланы жетілдірудің негізгі бағыттарын айқындап, заманауи технологияларды енгізу және мамандандырылған медициналық көмектің сапасын арттыру қажеттігін атап өтті.
Съезд жұмысын медицина ғылымдарының докторы, профессор, облыстың Құрметті азаматы Сағындық Ордабеков пен бас дәрігердің хирургия жөніндегі орынбасары Асқар Садықов үйлестірді. Олардың кәсіби ұйымдастыруының арқасында іс-шара жоғары ғылыми деңгейде өтіп, мазмұнды пікір алмасуға жол ашты.
Жалпы, мұндай кәсіби алаңдар медицина саласының дамуына тың серпін беріп, жаңа технологияларды енгізуге, дәрігерлер арасындағы байланысты нығайтуға және ең бастысы – көрсетілетін хирургиялық көмектің сапасын арттыруға ықпал етеді.
