Қазақстан Республикасы Президентінің соңғы Жолдауында белгіленген міндеттерді іске асыру аясында Тараз қаласы прокуратурасының бастамасымен «дропперлікке» қарсы кең ауқымды профилактикалық науқан басталды.
Өткен кеңейтілген мәжілісте осы мақсатта арнайы жұмыс тобының құрылғаны ресми түрде жарияланды.
Аталған топтың негізгі міндеті – қылмыстық заңнамаға енгізілген жаңа нормалардың мазмұнын және олармен көзделген жауапкершілікті халыққа қолжетімді түрде түсіндіру.
Жұмыс тобының құрамына еріктілер, белсенді жастар, жоғары оқу орындары мен мектептердің оқытушылары, зиялы қауым өкілдері және мемлекеттік органдардың қызметкерлері кірді.
Олардың басты мақсаты – тұрғындармен тікелей кездесулер өткізу, дәрістер мен презентациялар ұйымдастыру, сондай-ақ заңнамадағы жаңа өзгерістерді түсіндіретін көрнекі материалдарды тарату болып табылады.
Құқық қорғау органдарының өкілдері 16 қыркүйектен бастап «дропперлік» үшін 7 жылға дейінгі мерзімге бас бостандығынан айыру жазасын көздейтін Қазақстан Республикасының Қылмыстық кодексіне жаңа 232-1-баптың енгізілгенін еске салды.
Бұл өзгерістерді әрбір тұрғынға жеткізу мақсатында қала прокуратурасы бейнеролик пен ақпараттық брошюраларды таныстырды, онда банктік деректерді бөгде адамдарға беру қаупі нақты көрсетілген.
Сонымен қатар, жасақталған жастар тобы «Заң мен Тәртіп» жобасы аясында мектептерде, жоғары оқу орындарында және қоғамдық орындарда түсіндіру жұмыстарын жүргізіп, жаңа нормаларға қатысты құқықтық ақпаратты әрбір тұрғынға түсінікті әрі қолжетімді етуге күш салатын болады.
Жамбыл облысы прокуратурасы
