Осы уақытқа дейін денсаулық сақтау саласында стационарлық көмекті жетілдіру бойынша жауапты үйлестірушілер бекітіліп, кестеге сәйкес аудандарға шығып, шеберлік сағаттарын өткізіп, бейінді мамандардың кеңестері берілді.
ҚР ДСМ «Инновациялық технологияларды енгізу туралы 18.04.2023 ж. №288 бұйрығының негізінде Үздік тәжірибе орталықтары құрылып, бүгінде Меркі, Жамбыл, Талас, Қордай аудандық орталық ауруханаларында және №2 мен 5 қалалық емханаларында іске қосылып, жұмыстар атқаруда.
Денсаулық сақтау саласының «Ақылмандар кеңесінің» құрамы бекітіліп, саладағы өзекті мәселелер шешімін табуда. Медициналық ұйымдарда «Қоғамдық мониторинг және халықпен кері байланыс» тетігі жобасы (МИОМОС) енгізіліп, халықпен тығыз жұмыс орнатылды, — деді ол.
Жамбыл облысы әкімдігінің денсаулық сақтау басқармасының «Ахуалдық орталығы» ашылды, сонымен қатар барлық медициналық ұйымдарда науқастарды қолдау CALL орталығының қызметі жұмыс атқаруда.
Басқарманың ресми интернет ресурстарында, сонымен қатар жергілікті және республикалық БАҚ арқылы ақпараттандыру жұмыстары жүргізілуде. Әлеуметтік желіге тіркелушілер саны — (19,3 мың) адам болса, жарияланған ақпарат саны – 12 200.
Сондай-ақ алдағы уақытта 3 аудандағы (Меркі, Талас және Шу) аудандық орталық ауруханалары көпбейінді ауданаралық ауруханалары болып жаңғыртылады.
Бұдан бөлек:
- Тараз қаласында 400 төсек-орынға арналған көпбейінді аурухана құрылысын салу жоспарлануда (Тараз қаласы әкімдігіне жер телімін бөлу туралы сұраныс хат жолданды).
- 350 төсек-орынға арналған перинаталдық орталық салынады (Тараз қаласы Асқаров көшесінің соңынан 20 га жер телімі бөлініп, Шымкент қаласының жобасына байланыстырылатын болады).
- Тараз қаласында жедел-медициналық жәрдем стансасы салынады (Жергілікті бюджеттен 35,2 млн. тг қарастырылып, ЖСҚ әзірленді, бүгінгі күнге сараптама алынып, зерделенуде).
- Ұрықтың туа біткен даму ақауларын ерте диагностикалау және мүгедектіктің алдын-алу, сәбилер өлімін азайту, а.ж. қыркүйек айында облыстық перинаталдық орталықтың базасында «Клиника Одного дня» пилоттық жобасы жүзеге асырылады.
- А.ж. 3-тоқсанында облыстық перинаталдық орталық базасында республикалық деңгейде тәжірибе алмасу мақсатында «Метропластика» шеберлік сыныбы өткізіледі.
Жамбыл облысы Өңірлік коммуникациялар қызметі
