Тараз қаласында Елбасының «Болашаққа бағдар: рухани жаңғыру» бағдарламалық мақаласын ілгерілету мақсатында, «Туған жерге туыңды тік!» акциясы аясында сазгер, Қазақстан Республикасының Мәдениет қайраткері, «Құрмет» орденінің иегері Дүйсенәлі Дыбысалыұлы Бықыбаевтың «Ән – ғұмыр» атты шығармашылық кеші өтті.
Концерт шымылдығы Қазақ ұлт аспаптар оркестрінің орындауында Қазақстан Республикасының еңбек сіңірген қайраткері Мұхтар Рахманқұловтың дирижерлығымен кеш иесінің «Бабалар рухы» күйімен ашылды. Қазақтың əн əлемінің алтын қазынасын өзінің сыршыл да əуезді туындыларымен толықтырып жүрген сазгердің шығармаларын облысымызға, республикаға белгілі Айгүл Мақашева, Жанатбек Кəрібаев, Оңал Азаматова, Ғани Мəтебаев, Маралбек Бабақұлов, Нұрлан Əмірбетов, Мадина Сағымбекова, Жанна Асанқұлова, Əсел Уашева, Мейіржан Самылтыров, Қайсар Көкішев сынды әншілер нақышына келтіре орындады. Сондай-ақ, əн кешіне елімізге белгілі эстрада жұлдыздары Саят Медеуов, Досымжан Таңатаров, Əділ Сламхан мен Дана Махамбаева, «Астана» квартеті, «Алатау» триосы, Қайнар Қатбай арнайы қатысты.
Дүйсенəлі Бықыбаев лирик сазгер ретінде əншілер мен композиторлар қауымының арасында үлкен сый мен құрметке ие. Күллі қазақ даласына əуелей жеткен əндерін қазіргі таңда бірталай эстрада жұлдыздары орындап, тыңдарман қауымның құлақ құрышын қандырып жүр. Кеште көрермен назарына облыстық қазақ драма театрының əртістері «Əн-ғұмыр» атты компоизициялық қойылым ұсынды. Қойылым барысында Дүйсенəлі Бықыбаев өзінің рухани ұстазы саналатын белгілі композитор Мэлс Өзбековтың «Келші, Құланға» атты танымал əнін сахна төрінде көрермен халыққа арнайы орындап берді.
Концерт соңында Досымжан Таңатаров кеш иесінің əніне, белгілі ақын Ғайни Əлімбекқызының өлеңіне жазылған «Қаздар қайтып барады» атты жаңа əннің тұсауын кесті. Өз сөзінде эстрада жұлдызы орындалған əн Дүйсенəлі Дыбысалыұлымен творчестволық байланысты жаңғыртқан туынды екенін тілге тиек етті.
Əуезді əн кеші бір топ əншінің орындауында Дүйсенəлі Дысыбалыұлының «Жаса мəңгі Астана» атты əнімен рухты нотада аяқталды. Шара соңында кештің басты кейіпкеріне Жамбыл облысы әкімінің ықылас гүлі табысталды.
TURANINFO.KZ
