Елбасымыз Н. Ә. Назарбаевтың қоршаған ортаны көгалдандыру, табиғатты қорғау, жұмыссыз жастарды жұмыспен қамту мақстында 2005 жылы «Жасыл ел» мемлекеттік бағдарламасын енгізген болатын. Аталған бағдарламаны жүзеге асыруда 2019 жылы Тараз қаласында «Жасыл ел» еңбек жасақтарының жұмысын (ІІ, ІІІ, ІV тоқсан) ұйымдастыруға барлығы 350 жасты (ІІ -150 жас, ІІІ — 150 жас, ІV — 50 жас) уақытша жұмыспен қамту жоспарланып, бүгінгі күні оның 150-і жұмыспен қамтылды. Күніне 8 сағаттық уақытша жұмыспен қамтылатын жастардың бір айлық жалақысы 60 000 теңгені құрайды. «Жасыл ел» еңбек жасақтарының жауынгерлері «Қарасу» (5) және «Жансая» (11) ықшам аудандарының ортасында орналасқан «Қарасу-2» каналының арналарына тазарту жұмыстарын жүргізіп, 3 тонна қоқыс шығарып, 2 шақырымға (км) жуық жерді қамыс пен жабайы шөптерден тазартты.
Сонымен қатар, 29 мамыр күні Талас өзенінің бойында «Бір өзен – бір тағдыр!» атты Халықаралық экологиялық акция өткізілді. Акция барысында Қырғызстан Республикасының жастары мен «Жасыл ел» еңбек жасақтарының жастары Талас өзенінің бойын (Тектұрмас кесенесі маңы) қоқыстан тазартып, ескерту тақтайшаларын орнатты.
«Таза болса маңымыз сау болады тәніміз» — деп дана халқымыз айтпақшы Жасыл ел жасақшылары қоршаған ортаның көркеюіне, қоғамдық орындарының таза тұруына өз септіктерін тигізіп, тазалық барысында игілікті істердің үлгісі болуда. Қоғамға пайдасын тигізу тұрғысында аянбай қалатын жасақшыларымызға алдағы уақытта іске сәт демекшіміз.