2021 жылдың басынан 28 сәуірге дейін Тараз қаласында 1486 КВИ жұқтыру дерегі тіркелген. Сондай-ақ, пневмониямен ауырған 775 тұрғын анықталды. КВИ-мен және пневмониямен ауырғандардың 1676-сы үй оқшаулауында.
Инфекция жұқтырғандармен байланыста болған 6118 адам арнайы медициналық мекемелерге жатқызылды. Бақылау мерзімі аяқталған 3931 адам бақылаудан алынды.
«Ұлттық сараптама орталығының» облыстық филиалы инфекция анықталған ошақтарға (1057 үй ошағы, 227 жұмыс орны, палата) арнайы дезинфекциялық жұмыстар жүргізді. Бүгінгі таңда Тараздағы 250 төсек орны бар облыстық көп бейінді балалар ауруханасының инфекциялық блогы мен 200 төсек орны бар қалалық перинаталдық орталықта 383 науқас ем қабылдауда. Оның 60-ы айығып шықса, облыс бойынша 64 адам қайтыс болған.
Өткен жылы 12 тамызда облыс әкімі «Қызметтер мен ведомстволардың пандемияның 2-ші толқыны кезінде Жамбыл облысының тұрғындары арасында COVID-19-дың одан әрі таралуының алдын алу бағытындағы іс-әрекетінің стратегиялық жоспары» бекітілген болатын. Аталған жоспарға сәйкес, ағымдағы жағдай бойынша облыс ауруханаларында 1600 инфекциялық төсек қоры, оның ішінде 175 реанимациялық төсек қоры бар. Сондай-ақ, 135 төсек орынға арналған карантиндік стационарлар жұмыс атқаруда.
Covid-19 жұқтырған науқастарды емдеуге арналған қосымша резерв ретінде 3160 инфекциялық, оның ішінде 326 реанимациялық төсек қоры жасақталады деп жоспарлануда.
Қаладағы қоймаларда вирусқа қарсы дәрілік заттардың 2 айлық қоры бар. Нақтылап айтсақ, стационарларда 800 мыңнан аса дәрі, амбулаторияларда 300 мыңға жуық дәрі қоры жасақталған.
Биыл облысқа 2000 доза «KazCovid-in» және 81700 доза «Спутник V» екпесі жеткізілді. Екпені егу қала тұрғындары арасында қарқынды түрде жүргізілуде. 29 сәуірдегі жағдай бойынша облыстың 47822 тұрғыны екпе салдырды. Жалпы Тараз қаласындағы 9 емханада 186968 тұрғынға вакцина салу жоспарлануда.
Атай кету керек, 2020 жылдың 25 желтоқсанынан Тараз қалалық көпбейінді аурухананың базасында COVID-19-ға қарсы инактивтендірілген QazCovid вакцинасының клиникалық сынағының үшінші кезеңі басталды.
Тараз қаласы әкімдігінің Медиа-орталығы
