ТАРАЗ ҚАЛАЛЫҚ ПОЛИЦИЯ БАСҚАРМАСЫНДА «16-ЖЕЛТОҚСАН ҚАЗАҚСТАН РЕСПУБЛИКАСЫНЫҢ ТӘУЕЛСІЗДІГІ» КҮНІНЕ ОРАЙ ДӨҢГЕЛЕК ҮСТЕЛ ӨТТІ
2018 жылдың 12 желтоқсанында Тараз қалалық Полиция басқармасының мәжіліс залында Полиция басқармасының басшылығы, жеке құрамы, жас мамандар және БАҚ өкілдерінің қатысуымен дөңгелек үстел өтті. Мемлекеттік мерекенің қазақстандықтар үшін маңыздылығын ескере отырып, бұл шара ішкі істер органдарына жаңадан қабылданған қызметкерлердің Отанымызға деген сүйіспеншілігін арттыру мақсатында ұйымдастырылды.
Іс-шара жеке құрамның Қазақстан Республикасының Мемлекеттік Гимнін орындаудан басталды. Арнайы шақырылған М.Х.Дулати атындағы Тараз мемлекеттік университетінің оқытушысы магистр Серік Көшербаев жеке құрамға Тәуелсіздік алған кезеңге дейін қазақ елінің өткені мен келешегі туралы толық мағлұмат жеткізе отырып, қойылған сұрақтарға жауап беріп, дәйекті дәріс оқыды.
Сондай-ақ, Полиция басқармасының бірнеше қызметкерлері қаламыздың қоғамдық өміріне белсене атсалысып, қоғамдық қауіпсіздікті сақтауда қосқан қомақты үлесі мен жетістіктері үшін Тараз қалалық мәслихаты хатшысының және қала әкімінің «Құрмет грамотасымен» және «Алғыс хатымен» марапатталды.
Қоғам мен мемлекет мүддесі үшін қылмыспен күресті қамтамасыз етуге қосқан үлесі, сондай-ақ азаматтық борышын танытып, қылмыскерді қолға түсіруде полиция органдарымен өзара әрекеттестігі үшін Тараз қаласы №12 орта мектебінің 4-сынып оқушысы Абзал Нышанов шақырылып, ерлікпен қаза тапқан «Халық Қаһарманы» полиция капитаны Ғ.Байтасовтың суреті бейнеленген арнайы естелік сыйлық берілді. Сонымен қатар, Тараз қ. ПБ бастығының бұйрығымен өздерінің қызметтік міндеттерін адал атқарып, қырағылықпен қылмыстың ізін суытпай ашқан Тараз қалалық Полиция басқармасы Қабылдап-тарату орнының қызметкерлеріне алғыс хат табысталды.
Іс-шара соңында Тараз қ. ПБ қызметкерлеріне кезекті арнаулы атақтар ұсынылды.
ЖАМБЫЛ ОБЛЫСЫ ПОЛИЦИЯ ДЕПАРТАМЕНТІНІҢ БАСПАСӨЗ ҚЫЗМЕТІ