Киелі қалаға халықаралық деңгейде ерекше мәртебе берілмек. Түркістанда түркі және ислам әлемін тоғыстыратын қандай жиындар өтеді?
Киелі Түркістан қаласы 2027 жылы Ислам әлемінің мәдени астанасы мәртебесіне ие болады. Бұл туралы Мемлекет басшысы Қасым-Жомарт Тоқаев X әлеуметтік желісіндегі парақшасында мәлімдеді
Президенттің айтуынша, мұндай шешім Ислам әлемінің білім, ғылым және мәдениет мәселелері жөніндегі ұйымы (ИСЕСКО) тарапынан қабылданған.
Мемлекет басшысы бұл мәртебеге орай Түркістанда түркі өркениетінің рухани үндестігі мен сабақтастығын дәріптеуге бағытталған ауқымды мәдени іс-шаралар ұйымдастыру жоспарланып отырғанын атап өтті.
Атап айтқанда, әдебиет пен тіл мәселелеріне арналған Қожа Ахмет Ясауи халықаралық форумын өткізу көзделген. Сонымен қатар түркі және ислам әлемінің музей ісі мамандарының басқосуы ұйымдастырылады.
ИСЕСКО ұйымының шешімімен киелі Түркістан шаһары келесі жылы Ислам әлемінің мәдени астанасы атанбақ. Біз осы бастама аясында түркі өркениетінің рухани үндестігі мен сабақтастығын сақтауға ықпал ететін ауқымды шаралар өткізуді жоспарлап отырмыз, – деді Қасым-Жомарт Тоқаев.
Сондай-ақ Президент ғалымдарды аталған халықаралық іс-шараларға белсенді қатысуға шақырды.
Айта кетейік, Түркістан – түркі дүниесінің рухани орталықтарының бірі. Қалада Қожа Ахмет Ясауи кесенесі секілді тарихи және мәдени мұра нысандары орналасқан. Түркістанның жаңа мәртебесі оның халықаралық деңгейдегі мәдени және туристік әлеуетін танытуға мүмкіндік береді.







