Шу аудандық сотында «Шу ауданы әкімдігінің білім бөлімі» коммуналдық мемлекеттік мекемесінде аса ірі мөлшерде ақша қаражаттары жымқырылғаны бойынша сот процесі аяқталды.
Сот процесі барысында анықталғаны «Жамбыл облысы Шу ауданы әкімдігінің білім бөлімі» коммуналдық мемлекеттік мекемесінің бұрынғы басшысы және бөлімнің бас есепшісі, адамдар тобының алдын ала сөз байласуымен мемлекеттік қаржысын аса ірі көлемде жымқыру мақсатында 2015 жылдың қаңтардан 2018 жылдың қыркүйек айы арасында бөлімнің есепшілері жоспарланған қылмыстық пиғылдарын іске асыру мақсатында бас есепшіге адамдар тобының алдын ала сөз байласуымен сенiп тапсырылған бөтен мүлiктi жүйелі түрде талан-таражға салып жымқыру жолында көмектесушісі болып, өзінің таныс мұғалімдерінің мәліметтерін бас есепшіге беріп, олардың есеп-шоттарына артығымен заңсыз бюджет қаражаттарын жолдауға болатынын жеткізген соң, сол мұғалімдердің банктік карточкалық есеп-шоттарына заңсыз ақша қаражаттары аударылып, соңғылар ол ақша қаражаттарды банкоматтардан алынғаннан кейін есепшілерге өткізіп, соңғылар қаражаттарды бас есепшіге табыстап, кейінен осы заңсыз аударылған ақша қаражаттары қылмысқа қатысушылар арасында өзара бөлісіп, талан-таражға салынып жүйелі түрде жымқырылып келген.
Сот барысында сотталушылармен мемлекетке келтірілген залалдың 73 608 672 теңгесі қайтарылды, өтелмегені 91 110 737 теңге.
Сотта сотталушылар жасаған қылмыстық құқық бұзушылықтарын мойындап, шын ниетпен өкінді.
Соттың үкімімен Шу ауданы әкімінің орынбаcарына («Шу ауданы білім бөлімі» КММ экс-басшысына) мемлекеттік қызметте өмір бойына қызмет ету құқығынан айырып- 9 (тоғыз) жыл мерзімге бас бостандығынан айыру жазасы тағайындалды.
«Шу ауданы білім бөлімі» КММ бас есепшісіне мемлекеттік мекемелерде қаржымен байланысты жұмыс атқару құқығынан өмір бойына айыра отырып, 10 (он) жыл мерзімге бас бостандығынан айыру жазасы тағайындалды.
«Шу ауданы білім бөлімі» КММ есепшілеріне істеген әрекеттеріне байланысты бір жылдан жеті жылға дейін шартты түрде сотталды.
Мекеменің экс басшысы мен бас есепшісі сот залынан қамауға алынды.
Үкім күшіне енген жоқ.
Дереккөз: Шу аудандық сотының баспасөз қызметі
