Әр жұмысқа бақылау бар
«Нұр Отан» партиясы Жамбыл облыстық және Тараз қалалық филиалдарының Партиялық бақылау комиссиясының мүшелері облыс орталығында «Нұрлы Жол» мемлекеттік бағдарламасы аясында жүргізіліп жатқан құрылыс нысандарымен танысты.
Партиялық бақылау комиссиясының төрайымы, облыстық мәслихаттың депутаты, Тараз Мемлекеттік Педагогикалық институтының ректоры Дария Қожамжарова бастаған топ әуелі «Салтанат» мөлек ауданындағы 1000 орындық мектеп құрылысына аялдады. Тараз қаласы әкімдігі құрылыс бөлімінің тапсырысы шеңберінде бой көтеріп жатқан білім ордасының құрылысын «Арайстроймаркет» ЖШС-і жүргізуде. Құрылысы өткен жылдың маусым айында басталған мектеп биылғы жаңа оқу жылында оқушыларына есігін айқара ашуға толық мүмкіндігі бар. Өйткені, бүгінгі күні ондағы жоспарланған жұмыстың 90 пайызы тәмам болған. Құны 1305,9 млн. теңгені құрайтын нысанда 65 жұмысшы еңбек етуде. Орташа жалақысы 85 мың теңгені құрайтын жұмысшылар қазір нысан ішіне тазалау жұмыстары мен мектеп ауласын абаттандыруды қолға алыпты.
Мектепке табан тіреген топ жұмысын ғимарат сыртына пайдаланылған материалдармен танысумен бастады. Жалпы құрылыс барысымен таныстырған серіктестіктің участок басшысы Әділхан Еділбаев жобада нысан сыртын жылытқыш қаптама арқылы сылау көрсетілгенімен металло сайдинг жүргізгендіктерін жеткізді. Себебі, бұл өртке қауіпсіз әрі жылы екен. Сондай-ақ комиссия мүшелері мектептің сынып бөлмелері, асхана сырт киім ілетін орын мен мәжіліс, спорт залдарында болды. Онда олар орналасқан жиһаздар мен ішкі әрлеу жұмыстарына көңілдері толатындықтарын жеткізді. Дегенмен партиялықтар бірқатар істі жетілдіру қажеттігін алға тартты. Мәселен, ғимарат ішіндегі желдеткіш құралдарының сыртын қаптау керек екендігін айтып, мектеп көркін бұзып тұрғандығын жеткізді. Сонымен қатар ішкі баспалдақ жақтауларының тым аласа екендігін сынға алып, бала қауіпсіздігі ойластырылмағандығын аңғарды. Сондықтан құрылысқа жауапты мамандарға оны биіктетуді талап етті.
– Мұнда келгендегі басты мақсатымыз – нысан құрылысының уақытында пайдалануға берілуі мен сапасын бақылау. Салынып жатқан мектеп болғандықтан одан талап етілетін дүниелер көп. Мәселен, бұл жерде біздің болашағымыз білім нәрімен сусындайды. Бұл жерде 1500 бала білім алады екен. Олардың қауіпсіздігі бізді толғандырмай қоймайды. Дейтұрғанмен, заман талабына сай зәулім мектеп ғимараты бой көтеріп жатқанына қуаныштымыз, – дейді комиссия төрайымы Дария Пернешқызы.
TURANINFO.KZ
