ҚР Денсаулық сақтау министрлігі жүкті әйелдердің аурушаңдығы мен өлім-жітімін азайту жөніндегі шараларды іске асыруға аса көңіл бөлуде.
Әйелдер мен балалардың денсаулығын сақтау, қалпына келтіру және нығайту елдің денсаулық сақтау жүйесінің алдында тұрған өзекті міндет болып табылады.
Соңғы үш жыл ішінде пандемия шеңберінде босандыру қызметі жүкті әйелдерде коронавирустық инфекциямен сырқаттанудың өсуіне байланысты үлкен жүктемеге ұшырады, сондай-ақ босандыру ұйымдарының бір бөлігі инфекциялық стационарларға қайта бейінделді.
Сонымен қатар, 2021 жылы елімізде тәуелсіздік жылдары алғаш рет туу көрсеткіші жоғары болды, бұл қосымша ресурстар салуды талап етті.
Соңғы 5 жылда елімізде бала туу көрсеткіші 7,2% — ға артып, бала туу көрсеткіші 15% — ға артты.
Босандыру қызметінің шамадан тыс жүктелуіне және оның коронавирустық инфекциямен күреске қайта бағдарлануына байланысты, әлемнің көптеген елдеріндегі сияқты, елде де ана өлімі бойынша қолайсыз жағдай байқалды.
Ағымдағы жылы ана өлімі бойынша жағдай тұрақтанды, ана өлімі көрсеткіші 2021 жылдың сәйкес кезеңімен салыстырғанда 2,4 есеге төмендегені байқалады.
Жүкті әйелдердің аурушаңдығы мен өлім-жітімін төмендету мақсатында жағдайды тұрақтандыру үшін Министрлік тұрақты негізде бірқатар іс-шараларды іске асырып жатқанын атап өту қажет.
Осылайша, нормативтік-құқықтық база жетілдірілуде, еліміздің жетекші мамандарынан, медициналық жоғары оқу орындарының профессорлық-оқытушылық құрамынан «ҚР-да босандыру қызметінің өзекті мәселелері бойынша Сараптамалық кеңес» құрылды.
Әрбір өңірге консультативтік — практикалық көмек көрсету үшін республикалық клиникалар немесе медициналық ЖОО қызметкерлерінен куратор бекітілген.
Босандыру ұйымдарының тәжірибелі мамандарының жалақысын көтеру, ынталандыру және қолдау, сондай-ақ босану құнын (физиологиялық босануға арналған тариф) арттыру бойынша шаралар қабылдануда.
Министрлік жүкті болудан бастап әйелдерді оңалтуға дейінгі медициналық көмек кешенін көрсету үшін халықаралық талаптарға сәйкес келетін заманауи перзентханалар салу қажеттілігі туралы мәселені көтеруде.
Басым тақырыптар бойынша барлық деңгейдегі медицина қызметкерлерін жұмыс орнында, симуляциялық орталықтарда үздіксіз кәсіптік оқыту, сондай-ақ тәжірибелі медицина қызметкерлеріне тәлімгерлік ету арқылы жас мамандардың практикалық дағдыларын жақсарту жалғасуда.
ДДҰ елдік кеңсесінің техникалық қолдауымен медициналық қызметкерлерді антенаталды күтім және тиімді перинаталдық технологиялар бойынша оқыту жүргізіледі.
Жыл соңына дейін шетелдік жетекші клиникаларға 40 – тан астам акушер-гинеколог, неонатолог, реаниматолог дәрігерлерді біліктілігін арттыруға және инновациялық практикалық дағдыларды игеруге жіберу жоспарланып отыр.
Сондай-ақ, денсаулық сақтау ұйымдарын түгендеу нәтижелері бойынша басым бағыттар бойынша 2025 жылға дейін 187 млрд.теңгеден астам сомада медициналық техниканы сатып алуға қосымша қажеттілік айқындалды, 2022 жылға 26,4 млрд. теңгеге сатып алу жоспарлануда. Әрбір өңірде денсаулық сақтау басқармасының басшылары «ана өлімін азайту жөніндегі жедел жоспар» әзірледі және бекітті, оған сәйкес жағдайды жақсарту бойынша жүйелі шаралар қабылдануда.
