Жиында Қордай ауданында «AMANAT» партиясының «Халықпен бірге!» сайлауалды бағдарламасының орындалу барысы, сондай-ақ Қазақстан Республикасының 2022-2026 жылдарға арналған Сыбайлас жемқорлыққа қарсы саясаты тұжырымдамасынан туындайтын міндеттер мен осы бағыттағы атқарылып жатқан жұмыстар талқыланды.
Күн тәртібіндегі мәселелер бойынша аудан әкімінің міндетін атқарушы Жұлдызбек Бакаев баяндама жасап, ауданда жүзеге асырылып жатқан жұмыстарға тоқталды. Оның айтуынша, Қордай ауданында бағдарлама аясындағы 80 көрсеткіштің 48-ін орындау биылға жоспарланған. Қазіргі таңда 6 көрсеткіш толық орындалып, 35 көрсеткіш бойынша жұмыстар жалғасуда.
Кеңес барысында мүшелер бірқатар өзекті мәселелерді көтерді. Атап айтқанда, Қордай ауданы орталығында қайта жаңғыртудан өтіп жатқан стадион құрылысының баяу жүруі сынға алынып, нысанның толық аяқталу мерзімі сұралды. Сонымен қатар, ауданда сыбайлас жемқорлықтың алдын алу, оған жол бермеу бағытында құзырлы мемлекеттік органдармен бірлескен жұмысты күшейту қажеттігі айтылды.
Жиын қорытындысында көтерілген мәселелер бақылауға алынып, жауапты мекемелерге нақты тапсырмалар берілді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
