Марқұмның туыстары шешімге күмән келтіріп, күдіктінің «жынды» деп танылуы жазадан құтылудың амалы болуы мүмкін екенін айтады. Бұл туралы Stan.kz ақпарат агенттігі Информбюро бағдарламасына сілтеме жасап хабарлайды.
Нұрай Серікбайды аса қатыгездікпен өлтірді деген күдікке ілінген азамат психикалық орталыққа жатқызылған. Бұл жөнінде марқұмның жақындары хабарлады. Олардың айтуынша, бұған дейін денсаулығында кінәрат болмаған адамның аяқ астынан психикалық дертке шалдықты деп танылуы – жазадан жалтарудың бір тәсілі болуы мүмкін.
Марқұмның ағасы Сұлтан Серікбай медициналық анықтама берген дәрігерлердің әрекетін мұқият тексеруді талап етті.
«Біріншісі Шымкентте қаралған еді. Сондағы анықтамада психикалық ауытқуы байқалған деп жазып берген. Біз оған сенбей, Алматыға сараптама талап еттік, ол жаққа барды күдікті, ол жақта да осындай анықтама берді. Енді бұл жерде симуляцияның максималды белгілері көрініп тұр. Өйткені қылмыскер кәдімгі ортада өмір сүріп жүрген адам, кәдімгі сау адам. Естігенім бойынша қазір қылмыскер Шымкент қаласында емес. Ол Талғардағы психикалық емдеу орталығында», – деді Сұлтан Серікбай.
Әзірге құзырлы орган өкілдері осы жайтқа қатысты ресми ақпарат таратқан жоқ.
