Мойынқұм ауданында елді мекендерді сапалы ауыз сумен қамтамасыз ету бағытындағы жұмыстар жүйелі түрде жүзеге асырылуда. Осыған орай аудан әкімі Ермек Карентаев Мойынқұм ауылына кіреберісте орналасқан ауыз су имаратында болып, нысанда жүргізіліп жатқан жаңғырту жұмыстарының барысымен танысты.
Мемлекет басшысының халықты сапалы ауыз сумен қамтамасыз ету жөніндегі тапсырмасына сәйкес биыл аудандағы Мойынқұм, Мыңарал, Шығанақ, Бірлік, Биназар және Құмөзек ауылдарының су жүйелерін жаңғырту жобалары іске асырылуда. Жобалардың негізгі мақсаты – тұрғындарды тәулік бойы үздіксіз ауыз сумен қамтамасыз ету.
Қазіргі уақытта Мойынқұм ауылындағы су имаратында күрделі жаңғырту жұмыстары жүргізілуде. Жоба аясында насос қондырғылары ауыстырылып, су құбырлары жаңартылуда. Сонымен қатар резервуарларды тазалау, жөндеу және оларды техникалық талаптарға сәйкестендіру жұмыстары атқарылуда.
Нысанды аралау барысында аудан әкімі мердігер ұйым өкілдерімен кездесіп, құрылыс жұмыстарының сапасы мен белгіленген мерзімде аяқталуына назар аударды. Мердігер мекеменің мәліметінше, жоба бойынша барлық жұмыстарды жыл соңына дейін аяқтау жоспарланған. Нәтижесінде ауыл тұрғындарын ауыз сумен уақытпен қамтамасыз ету тәжірибесі тоқтатылып, тәулік бойы үздіксіз су беру жүйесіне көшу көзделуде.
Аудан әкімдігі тарапынан жобаның іске асырылу барысына тұрақты бақылау жүргізілуде. Сондай-ақ тұрғындарды сапалы ауыз сумен қамтамасыз етуге бағытталған жұмыстар алдағы уақытта да жалғасатын болады.
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді
