2026 жылғы 9 шілдеде Мойынқұм ауданында Қазақстан Республикасы Президентінің бастамасымен жүзеге асырылып жатқан «Заң мен тәртіп» тұжырымдамасы аясында ұйымдастырылған «Өз құқығыңды біл» республикалық акциясы шеңберінде азаматтарды қоғамдық қабылдау өткізілді.
Іс-шара Мойынқұм ауылындағы Қайрат Рысқұлбеков көшесінде орналасқан аудандық халыққа қызмет көрсету орталығының алдында ұйымдастырылды. Бұл орын ауданға қарасты ауылдардың тұрғындары жиі келетін, халық көп шоғырланатын нысан болғандықтан арнайы таңдалды. Қабылдаудың мақсаты – тұрғындарға құқықтық кеңес беріп, мемлекеттік органдар өкілдерімен тікелей байланыс орнатуға мүмкіндік жасау.
Қоғамдық қабылдауға аудандық прокуратура, аудан әкімдігі бөлімдерінің басшылары, Мойынқұм ауылдық округі әкімдігі, аудандық полиция бөлімі, аудандық орталық аурухана, аудандық білім бөлімі, аудандық мемлекеттік кірістер басқармасы, аудандық Мансап орталығы және аудандық төтенше жағдайлар бөлімінің өкілдері қатысты.
Акция барысында 70-ке жуық аудан тұрғыны өздерін толғандырған мәселелер бойынша жауапты сала мамандарынан кеңес алды. Азаматтар негізінен жұмыспен қамту, ауыз сумен қамтамасыз ету, тұрғын үй, әлеуметтік қолдау, білім беру, денсаулық сақтау, салық саласы және қоғамдық қауіпсіздік мәселелерін көтерді.
Мемлекеттік органдардың мамандары тұрғындардың әрбір өтінішін мұқият тыңдап, қолданыстағы заңнама талаптарына сәйкес құқықтық түсіндіру жұмыстарын жүргізді. Сонымен қатар, бірқатар мәселелер бойынша нақты шешу жолдары ұсынылып, қосымша зерделеуді қажет ететін өтініштер бақылауға алынды.
Мұндай қоғамдық қабылдаулар азаматтар мен мемлекеттік органдар арасындағы ашық диалогты нығайтып, халықтың құқықтық сауаттылығын арттыруға және тұрғындардың өзекті мәселелерін жедел шешуге ықпал етеді.
Айта кету керек, «Заң мен тәртіп» тұжырымдамасы аясындағы «Өз құқығыңды біл» республикалық акциясының негізгі мақсаты – азаматтардың құқықтық мәдениетін қалыптастыру, заң талаптарын кеңінен түсіндіру, мемлекеттік қызметтердің қолжетімділігін арттыру және әрбір азаматтың өз құқықтарын тиімді қорғауына жағдай жасау.
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді.
