Алты ай ішінде барлығы 7 365 талап қою иелеріне кері қайтарылған, бұл жалпы түскен арыздардың 30,3 пайызын құрайды. Ал 292 талап қоюды қабылдаудан мүлдем бас тартылды. Өткен жылдың осы кезеңімен салыстырғанда қайтарылған талаптардың саны 92,7 пайызға дерлік өсіп кеткен.
Мамандар мәселені ашып сараптау барысында қайтарылған талап қоюлардың басым бөлігі бұйрықтық өндіріспен қаралатын істерге тиесілі екенін анықтады. Мәселен, ағымдағы жылдың алты айында түскен 5 679 бұйрықтық арыздың 3 409-ы қайтарылған. Зерттеу көрсеткендей, талап қоюларды кері қайтаруға негіз болған ең басты себеп – Азаматтық процестік кодекстің 152-бабы 1-бөлігінің 1) тармақшасын сақтамау, яғни дауды сотқа дейін шешу тәртібінің орындалмауы.
Азаматтар мен заңды тұлғалардың дауды сотқа жеткізбей реттеу талабын елемеуі салдарынан 3 465 арыз (барлық қайтарылғандардың 47,04%-ы) кері қайтарылды. Әсіресе микроқаржы ұйымдары мен коллекторлық агенттіктер борышкерлерден қарызды өндіру кезінде міндетті сотқа дейінгі реттеу процедураларын орындамай, бірден сотқа жүгінуді әдетке айналдырған. Бұдан бөлек, арыздағы кемшіліктерді жоймастан сотқа қайтадан талап қою беру фактілері де сот статистикасын жасанды түрде өсіріп отыр. Сот жүйесі бұл олқылықтарды азайту мақсатында қаржы мекемелері мен коллекторлық агенттіктер өкілдерімен арнайы түсіндіру жұмыстарын, семинарлар мен кездесулерді жиі өткізе бастады.
Фото ЖИ көмегімен әзірленді
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
