Қазақстан Республикасы Мемлекеттік қызмет істері агенттігінің бастамасымен азаматтардың мемлекеттік қызмет көрсету сапасына шағым білдіруі және кері байланыс орнату мақсатында жаңа платформа енгізілді.
Telegram мобильді қосымшасындағы EgovKzBot2.0 бот-платформасы арқылы азаматтар мемлекеттік көрсетілетін қызметтер бойынша шағым жолдай алады, сондай-ақ бюрократиялық кедергілерді азайту және бизнес-процестерді оңтайландыру жөнінде ұсыныстар енгізе алады.
Аталған функцияны енгізуге Қазақстан Республикасы Мемлекеттік қызмет істері агенттігі мен Қазақстан Республикасы Цифрлық даму, инновациялар және аэроғарыш өнеркәсібі министрлігі бастамашы болды. Платформаның интерфейсі қарапайым әрі қолдануға ыңғайлы, арнайы дағдыларды талап етпейді.
Енді мемлекеттік қызмет алу барысында артық құжат талап ету, негізсіз бас тарту, қызметті уақытылы көрсетпеу және басқа да заңбұзушылықтар орын алған жағдайда азаматтар бот арқылы тікелей шағым жолдай алады. Барлық өтініштер жауапты тұлғалар тарапынан қаралып, қысқа мерзімде кері байланыс беріледі.
Жамбыл облысы бойынша көрсеткіштер:
2025 жылдың 12 айында «EgovKzBot2.0» платформасы арқылы өңірге қатысты 64 шағым түсті. Оның ішінде:
-
39 шағым бойынша мәселе шешімін тапты;
-
25 шағымға түсіндірме жұмыстары жүргізілді;
-
1 азаматтың құқығы бот арқылы қалпына келтірілді.
Жалпы 2025 жылдың қорытындысы бойынша 731 қызмет алушының құқықтары қорғалып, қалпына келтірілді. Атап айтқанда:
-
145 құқық — жоспарлы тексеру барысында;
-
19 құқық — жоспардан тыс тексеру нәтижесінде;
-
19 құқық — сұрау салу арқылы;
-
547 құқық — қашықтықтан бақылау арқылы;
-
1 құқық — Telegram-бот арқылы.
Анықталған заңбұзушылықтар бойынша тиісті мемлекеттік органдарға ұсыныстар енгізілді.
Еске саламыз, мемлекеттік қызмет көрсетуден негізсіз бас тартылған немесе заңды құқықтарыңыз бұзылған жағдайда, ҚР Мемлекеттік қызмет істері агенттігінің Жамбыл облысы бойынша департаментіне Тараз қаласы, Рысбек батыр бұрылысы, 8 «А» мекенжайы бойынша немесе 8 (7262) 43-88-08 телефоны арқылы хабарласуға болады.
Сондай-ақ өтінішті E-otinish бірыңғай платформасы арқылы да жолдауға мүмкіндік бар.
