«Бизнестің жол картасы — 2025» бизнесті қолдау мен дамытудың мемлекеттік бағдарламасының мақсаты – өңірлік кәсіпкерліктің тұрақты және теңгерімді өсуін қамтамасыз ету, сондай-ақ бар жұмыс орындарын сақтау және жаңа тұрақты жұмыс орындарын құру. «Бизнестің жол картасы-2025» кәсіпкерлікті қолдау мен дамытудың мемлекеттік бағдарламасы аясында субсидия тетігі бойынша 2021 жылдың 1 шілдесіне Тараз қаласында 6 млрд. 26,9 млн. теңгеге 448 жоба қаржыландырылды немесе орындалуы 236% және «Банк кредиттері бойынша кепілдік беру» тетігі бойынша 2021 жылдын 1 шілдесіне 2 млрд. 491,2 млн. теңгеге 475 жоба кепілдендірілген.
Ал өңірлерді дамытудың 2020-2025 жылдарға арналған мемлекеттік бағдарламасының мақсаты – басқарылатын урбандалу арқылы өңірлердің экономикалық бәсекеге қабілеттілігін арттыру және халықтың тұрмыс сапасын жақсарту. «Қарасу» (Құмшағал) дренаж желілерін салуға ұлттық қордан 570,5 млн. теңге және облыстық бюджеттен 63,4 млн. теңге бөлініп, қазіргі таңда 30 пайызға жұмыстар аяқталды. Жалпы бұл нысан 2022 жылға өтпелі болып табылады. Ағымдағы жылы «Тұрғын үй коммуналдық дамудың 2020-2025 жылдарға арналған» бағдарламасы аясында республикалық бюджеттен 2 млрд. 691,9 млн. теңге кредит бөлініп, 57 көпқабатты тұрғын үйге және қалалық бюджеттен 359,8 млн. теңге бөлініп, 18 көпқабатты тұрғын үйге күрделі жөндеу жұмыстары жүргізілетін болады.
Тұрғын үй-коммуналдық дамудың 2020-2025 жылдарға арналған «Нұрлы жер» мемлекеттік бағдарламасының мақсаты – тұрғын үйдің қолжетімділігі мен жайлылығын арттыру және тұрғын үй инфрақұрылымын дамыту. Бүгінде «Құмшағал», «Шөлдала» шағын аудандары мен 28 саяжай алқаптарын, «Шалғай Қарасу 1,2,3,4,5,6,7» тұрғын алқаптарын электрмен жабдықтау құрылысы жүргізілуде. Абай даңғылының бойындағы Тастандиев көшесінен бастап Майқы би көшесіне дейінгі Ы.Дүкенұлы көшесінің бойындағы су сорғыш станциясынан бастап Элеваторная көшесіне дейінгі су құбырларын қайта жаңғырту жобалары іске асырылады
Ал, өткен жылдан өтпелі «Қарасу» алқабындағы инженерлік-коммуникациялық инфрақұрылым желілері пайдалануға беріледі деп күтілуде. «Тектұрмас», «Қарасай» тұрғын алқаптарын, «Құмшағал», «Шөлдала» шағын аудандары мен 28 тұрғын алқаптарын ауыз сумен қамту бойынша құжаттары әзірленуде. Бүгінде «Көлтоған», «Құмшағал» шағын аудандары мен «Тектұрмас» тұрғын алқабының сараптама қорытындылары алынып, бюджеттік өтінім берілген.
Қалған нысандардың сараптама қорытындылары 1 қыркүйекке дейін алынады деп күтілуде. Ал, «Барысхан» тұрғын алқабын сумен қамтамасыз етудің 3-ші кезеңіне жобалық-сметалық құжаттары «МПК Проект» жобалаушы мекемемен әзірленуде. Сараптама қорытындысымен нысан құжаттары ағымдағы жылдың тамыз айында дайын болады деп жоспарлануда. Ағымдағы жылы «Тараз қаласының газ желілерін жаңғырту» жобасы жалғасын тауып отыр. Бүгінде «Қант зауыты», «Кірпіш зауыты» тұрғын алқаптарында газдандыру жұмыстары басталып, жұмыстар атқарылуда.
Жалпы, ағымдағы жылы Тараз қаласында 37 көппәтерлі тұрғын үйдің құрылысы жүргізіліп, бүгінде 13 тұрғын үй пайдалануға берілген. Ағымдағы жылы 37 көппәтерлі тұрғын үйдің құрылысы жүргізілуде. Оның 28-і 2020 жылдан өтпелі және 9 тұрғын үйдің құрылысы жаңадан басталған, пәтерлер саны жалпы саны – 2 120-ны құрайды. Бүгінгі таңда, «Бәйтерек» шағын ауданында орналасқан 6 панельді тұрғын үйдің, 15 шағын ауданында орналасқан 80 пәтерлі 7 тұрғын үйдің құрылысы аяқталып, пайдалануға берілген. Бұдан өзге, ірі панельді 5 әлеуметтік тұрғын үйдің және 12 кредиттік тұрғын үйдің құрылысына 8 млрд. теңге қаражат қарастырылып, қазіргі таңда мемлекеттік сатып алу конкурсы өткізілуде. Жеке құрылыс компаниялары тарапынан 4 мердігер барлығы 308 пәтерді құрайтын 5 көпқабатты тұрғын үйлердің құрылысын жүргізуде. Жыл соңына дейін 254 пәтерлі 4 тұрғын үй қолданысқа беріледі деп күтілуде.
Материал Жамбыл облысы әкімдігінің ішкі саясат басқармасының тапсырысы бойынша дайындалды
