Оның айтуынша, Денсаулық сақтау министрлігімен бірлесіп, оқушылардың дұрыс тамақтануын қамтамасыз етуге бағытталған қадамдар кешені жүзеге асырылуда.
«Бекітілген стандарттардан бөлек, біз бірқатар қосымша шаралар қабылдадық. Баланың денсаулығына теріс әсер етуі мүмкін тұз, қант және тағы да басқа зиянды ингредиенттерді азайтамыз. Сондай-ақ күнделікті тамақтану сапасын тексеруге мектеп медбикелері тартылады»,
— деп атап өтті Ғани Бейсембаев.
Бұрын медицина қызметкерлері бұл процеске қатыспайтын, сондықтан да қадағалау үшін жауапты емес еді.
Бұдан басқа, бұрын Кәсіпкерлік кодекс шеңберінде жоспардан тыс тексерулерге салынған тыйым алынып тасталды. Енді санитарлық-эпидемиологиялық қызмет (СЭҚ) мектептерге тамақ берумен айналысатын ұйымдарды кез келген уақытта ескертусіз тексеруге құқылы.
Ішкі бақылау да күшейтілді. Бұрын тамақты айына бір рет тексеретін мектептердегі Бракераждық комиссиялар енді күнделікті қадағалауды жүзеге асыруға міндетті. Сонымен қатар, заң бұзушылықтарды болдырмау және жауапкершілікті арттыру мақсатында қызметкерлерді қосымша оқыту жүргізілді.
