Жетінші сайланған Қазақстан Республикасы парламенті мәжілісінің сайлауы 2021 жылғы 10 қаңтарда өтті. Сайлауға қатысқан бес партияның үшеуі сайлаушылардың 7 пайыздан астамының дауысына ие болып, парламент мәжілісінің құрамына кірді.
Олар: «AMANAT» партиясы (71,09%), Қазақстанның «Ақ жол» демократиялық партиясы (10,95 %) және Қазақстан Халық партиясы (9,10 %).
«AMANAT» партиясынан парламент мәжілісінде 76, «Ақ жол» партиясынан 12, Қазақстан Халық партиясынан 10 депутат қызмет етеді. 9 депутат Қазақстан халқы Ассамблеясынан сайланды. Жетінші сайланған мәжіліс құрамына алдыңғы шақырылымның 32 депутаты кірді. Жалпы депутаттық корпус 70 %- ға жаңарды.
Мәжілістің жаңа құрамында: ер адамдар – 78 (73%), әйел адамдар – 29 (27%). Депутаттардың орташа жасы – 50 жас (2021 жылғы қаңтардағы жағдай бойынша). 40 жасқа дейін – 19 депутат, 40-тан 60-қа жасқа дейін – 69 депутат, 60 жастан асқандар – 19 депутат.
Мәжіліс депутаттарының 30-ы (28 %) ғылым докторлары мен кандидаттары ғылыми атақтарына ие. Мәжіліске дейін депутаттар әртүрлі салада еңбек еткен: мемлекеттік қызмет, бизнес, үкіметтік емес ұйымдар, білім, медицина және т.б. Мәжілістің ұлттық құрамында қазақтар, орыстар, белорус, кәріс, неміс, әзірбайжан, армян, күрд, татар, өзбек, ұйғыр және украин этностарының өкілдері бар.
Жетінші сайланған мәжіліс депутаттары 4053 сауал жолдапты. «Ақ жол» Қазақстан Демократиялық партиясының фракциясы депутаттары ішінен ең көп сауал жолдаған Барлыбаев Ерлан 174 , Қазыбек Иса 159, Ерубаев Серік 159, Дүйсенбинов Берік 159. Ең азы Хамзин Ғани 74 депутаттық сауал жолдады.
Қазақстан Халық партиясының фракциясы депутаттары тобынан ең белсенді Смирнова Ирина 138 сауал, Қоңыров Айқын 123, Құлахметов Ғазиз 121, ең аз сауал жолдағандар Магеррамов Магеррам 21, Нұғыманова Гаухар 20 сауалға қол қойған.
«AMANAT» партиясының фракциясы ішіндегі ең белсенді 10 депутат:
Әбсеметова Әлия 88 сауал;
Шиповских Геннадий 77 сауал;
Қаратаева Фахриддин 48 сауал;
Смышляева Екатерина 46 сауал;
Бейсенбаев Елнұр 44 сауал;
Нұрымова Гүлдара 42 сауал;
Камасова Зарина 35 сауал;
Сүлейменова Жұлдыз 34 сауал;
Абасов Қайнар 33 сауал;
Ожаев Нұрлыбек 28 сауал;
Ең аз сауал жолдағандарды да көрсетуге тура келіп тұр. Бас-аяғы үш сауал жолдағандар Бойчин Анатолий, Колода Дмитрий, Тайжанов Ерлік, Симонов Сергей. Екі сауал жолдағандар Әлия Сүйіндікқызы. Бір сауал жолдағандар Панченко Игорь. Бұл тізімге спикер мен оның орынбасарлары есепке алынбады.
