Облыстық халық шығармашылығы орталығының ұйымдастыруымен өткен мәдени шара классикалық музыканы кеңінен дәріптеуге, отандық және халықаралық деңгейдегі танымал өнерпаздардың шығармашылығын насихаттауға бағытталды.
Кеш барысында әлемдік опера өнерінің танымал өкілі, Қазақстанның Халық әртісі Майра Мұхамедқызы, Игорь Благодарный, Кенен Әзірбаев атындағы Жамбыл облыстық филармониясының әншісі Әсел Уашева, сондай-ақ Өзбекстан Республикасынан халықаралық конкурстардың лауреаты Малика Норматова, Қырғыз Республикасының еңбек сіңірген әртістері Айзирек Момунова мен Айбек Саралаев әлемдік және қазақ классикасының таңдаулы туындыларын жанды дауыста орындады.
Музыкалық бағдарламаны Шымкент қалалық опера және балет театрының симфониялық оркестрі сүйемелдеді. Оркестрге дирижер Мади Жұмағалиұлы жетекшілік етті. Музыка кешін өнер саласының өкілдері, зиялы қауым мүшелері, қала тұрғындары мен өнерсүйер қауым, сондай-ақ бұқаралық ақпарат құралдарының өкілдері тамашалады.
Шетелдік және отандық өнерпаздардың орындауындағы классикалық шығармалар көрерменнің ыстық ықыласына бөленіп, кештің мазмұнын байыта түсті. Жоғары орындаушылық шеберлік пен әуезді музыкалық туындылар көрерменге ерекше әсер сыйлады.
Іс-шара соңында өнерпаздарға Жамбыл облысы әкімінің ықылас гүлі тарту етілді.
