№8 бірмандаттық аудандық сайлау округі бойынша Жамбыл аудандық мәслихатының депутаттығына «Әділет» партиясынан ұсынылған кандидат Алданыш Қуанышбаевич Айниязовтың 2026–2031 жылдарға арналған сайлауалды бағдарламасы жарияланды. Кандидаттың бағдарламалық құжатына сәйкес, оның негізгі мақсаты – әділетті қоғам қалыптастыруға ықпал ету, ауыл тұрғындарының табысын арттыру және елді мекендердегі күнделікті тұрмыстық мәселелерді шешу. Ол өз қызметінде әр тұрғынға әділ қарау, ауылдардың ерекшелігін ескеру және халықпен ашық байланыс орнату қағидаттарын басшылыққа алатынын мәлімдеген.
Алданыш Айниязов 1980 жылы дүниеге келген, Нөкіс политехникалық колледжін «Аудитор» мамандығы бойынша тәмамдаған. Еңбек жолын 2007 жылы «Тех сервис» ЖШС-де механик-инженер болып бастаған ол 2019 жылдан бері Жамбыл ауданының Аса ауылындағы Бауыржан Момышұлы атындағы мектеп-гимназия директорының шаруашылық ісі жөніндегі орынбасары қызметін атқарып келеді. Бес бала тәрбиелеп отырған отағасы және білім беру мекемесінің шаруашылық жұмыстарына жауапты маман ретінде кандидат ауылдардағы инфрақұрылымдық және әлеуметтік түйткілдерді жақсы білетінін алға тартады.
Бағдарламаның алғашқы бағыттары Айшабибі ауылының инфрақұрылымын жаңғыртуға арналған. Атап айтқанда, кандидат ауыл көшелерін ағымдағы және орташа жөндеуден өткізуге, қоғамдық көліктің тұрақты қатынауын қамтамасыз етуге және жол қауіпсіздігі мен қоғамдық тәртіпті сақтау мақсатында көшелерге бейнебақылау камераларын орнатуға ықпал етуді көздейді. Сонымен қатар, жеке тұрғын үйлердегі ауызсу қысымын реттеу, тозған инженерлік желілерді жөндеу, электр энергиясымен үздіксіз қамту және көшелерді жарықтандыру жұмыстарын кеңейту міндеттері белгіленген.
Ауыл экономикасы мен ауыл шаруашылығын дамыту мәселесіне де бағдарламада айрықша назар аударылған. Алданыш Айниязов «Ауыл аманаты» бағдарламасы аясында тұрғындарға жеңілдетілген несие беру мүмкіндіктерін кеңейтуге, отбасылық кәсіпкерлік пен ауыл шаруашылығы кооперативтерін қолдауға жәрдемдесуді ұсынады. Бұған қоса, мемлекетке қайтарылған жерлер есебінен тұрғындарды жайылымдық алқаптармен қамтамасыз ету, ветеринариялық инфрақұрылымды дамыту, сондай-ақ ауыл шаруашылығы өнімдерін өңдеу мен шағын бизнеске инвестиция тарту арқылы тұрақты жұмыс орындарын ашу жоспарланған.
Әлеуметтік қорғау, білім беру, цифрландыру және жастар саясаты бағдарламаның маңызды құрамдас бөлігі ретінде көрсетілген. Кандидат мектептер мен балабақшалардың материалдық-техникалық базасын жақсартуды, білім ұйымдарына баратын жолдардың қауіпсіздігін күшейтуді және шалғай елді мекендердегі ұялы байланыс пен интернет сапасын арттыруды басымдық ретінде айқындаған. Сондай-ақ, қарт адамдар, балалы отбасылар мен мүгедектігі бар азаматтарға әлеуметтік қызметтердің қолжетімділігін арттыру, ал жастарды «Жасыл ел» және «Жастар тәжірибесі» бағдарламалары арқылы жұмыспен қамтып, бұқаралық спортқа тарту көзделген.
Кандидаттың сайлауалды құжатында қамтылған тоғыз бағыт Айшабибі ауылы мен №8 округ аумағындағы өзекті әлеуметтік-экономикалық және инфрақұрылымдық мәселелерді кезең-кезеңімен шешуге бағытталған ұсыныстарды біріктіреді.
Дайындаған: «ID Corp» ЖШС.
Тапсырыс беруші: А.Қ. Айниязов.
№8 бірмандаттық аудандық сайлау округі бойынша Жамбыл аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді.





