Қазақстан мен Италия шеберлерін мәдениет пен өнер арқылы біріктіріп, тығыз ынтымақтастықтың жемісі әрі қолөнер шеберлерінің өткен мен бүгінді жалғастырар сабақтастығы ретінде, Тараз қаласында алғаш рет Жамбыл облысы әкімдігінің мәдениет, архивтер және құжаттама басқармасының ұйымдастыруымен «Көне Тараз жаңғырығы. Еуразияның мәдени көпірлері» атты Халықаралық Қазақстан-Италия көрмесі өтті.
Халықаралық көрмеге Италияндық суретшілер: шыны әрлеуші Джордж Спеццамонти, суретші Светлана Коста, Итальяндық суретшілердің Қазақстандағы ресми өкілі Құралай Сқақова және «Асыл-Дизайн» сән үйінің бас дизайнері Айдархан Қалиев қатысты.
Көрме Жамбыл облысы әкімі аппаратының басшысы Нұржан Сәбитұлының құттықтау сөзімен ашылып, шетелдік қонақтарға қазақы дәстүр бойынша сый-сияпаттар табысталды. Италиядан келген суретші, шыны әрлеуші Джорджио Спеццамонти, суретші Светлана Коста сөз сөйлеп, венеция шынысынан жасалынған «Қызғалдақ» туындысын және С.Коста Астананы бейнелеген картинасын Жамбыл облыстық тарихи-өлкетану музейіне тарту етті.
Көрме барысында жерлесіміз, «Асыл дизайн» сән үйінің бас дизайнері, «Нео-фольклор» стилінің негізін салушы Айдархан Қалиев киім топтамаларынан дефиле көрсетілімін ұсынды.
Шаһарымызда тұңғыш рет өткізілген көрмеде атақты Италияндық шыны жасау шебері Пино Синьореттоның, Америка мектебінің өкілі, шыны шебері, дизайнер Шенг Карина Сесилияның шыны бұйымдарынан жасалған жәдігерлерімен қоса, Джорджио Спеццамонтидің венецияндық шыныдан жасалған, ұлттық ою-өрнектерімізбен өрнектеліп, алтынмен апталған «вазасы» мен қызыл камзол бейнесі көмкерілген, күміспен күптелген «тамақ салғыш» т.б ыдыстары, тәуелсіз Отанымыздың жас қаласы- Астанаға арналған Светлана Костаның суреттері «Жаңа қаланың күн шуағы», «Түнгі Астана оттары», «Әлем құсы» т.б еңбектері ұсынылды.
P.S: Аталған көрменің тарихи Тараз шаһарында өтуінің өзіндік мағынасы бар. 9-10 ғасырлардағы – қаламыздың өрлеу кезеңінде шыны өндірісі ерекше қолға алынып, көркемдігі жоғары бұйымдар Ұлы Жібек жолы арқылы шығыс елдерге, Еуропаға кеңінен тараған. Бүгінгі шара шыны бұйымдарын әзірлеумен ғұмыр бойы айналысып келе жатқан Италия елі мен тарихи Тараз арасындағы мәдени һәм рухани ынтымақтасты нығайту жолындағы ірі серпілістердің бірі болып табылатыны сөзсіз. Көрменің алдағы 1 ай бойы Тараз қаласының тұрғындары мен қонақтары үшін есігі айқара ашық.
Арайлы Жақсылық
