Жамбыл облысы Шу ауданында құрамында есірткі заты бар жабайы өсімдіктердің өсіп жетілетін кезеңі маусым-қазан айларында жыл сайын өтетін «Көкнəр-2017» жедел профилактикалық шарасы басталды. Шараның негізгі мақсаты 140-мың гектардан аса аумақта көкнəр өсетін Шу алқабынан каннабистік топтағы есірткілерді дайындаумен айналысатын адамдарды ұстау жəне заңсыз есірткі айналымын жою , қылмыстық жолмен қаржылық пайда табу мақсаатында криминалдық іс-əрекетпен айналысатын ұйымдасқан қылмыстық топтар мен олардың инфрақұрылымының экономикалық негіздерін бұзу болып табылады. Жыл сайын өткізілетін «Көкнəр» операциясының нəтижесінде көптеген қылмыстың беті ашылып, есірткі қылмысының саны азайып келеді. Мысалы, былтырғы жылғы көрсеткіш бойынша 157 қылмыс тіркелген. Оның ішінде 45-і есірткіні сату фактісі, 85-і аса ірі көлемде сақтау, 14-і есірткі контрабандасы, 7-еуі құрамында есірткі заты бар өсімдік өсіру фактісі.
Нəтижесінде есірткінің заңсыз айналымынан 19,3 түрлі есірткі заттары, оның ішінде 27,3 кг героин, 41,5 кг гашиш тəркіленген. Аймақаралық «Дельта-Долина» есірткі бизнесіне қарсы күрес бөлімінің алаңында, «Көкнəр» жедел-профилактикалық шарасына қатысатын арнайы əскери құрамның алдында сөз сөйлеген министрдің бірінші орынбасары полиция генерал-лейтенанты Марат Демеуов жедел-профилактикалық шараның діттеген мақсаты — заңсыз айналымдағы есірткі мөлшерін азайту екенін нақты атап өтті. Нашақорлық пен есірткі бизнесіне қарсы күрестің нəтижелі болуы тікелей шекара жəне кеден қызметтері мен ішкі істер органдарының бірлесе атқарған жұмыстарына байланысты. Операцияның өтуіне Жамбыл облыстық ІІД – ға қосымша «Бүркіт» ұлттық гвардиясының арнайы бөлімі жұмылдырылды. Мұнымен қоса жетуге қиындық тудыратын орындарға ұшқышсыз басқарылатын ұшу аппараттары пайдаланылатын болады. Күндізгі жəне түнгі уақыттарда пайдаланылатын замануи техникалық құралдармен мобильді (ұтқыр) жедел- іздестіру топтары құрылды. Министрдің бірінші орынбасары операцияның нəтижелі өтуіне атсалысатын барлық қызметтерге қарағанда негізгі күш Жамбыл облыстық ІІД-нің жеке құрамына түсетінін алға тартты. «Көкнəр-2017» жедел-профилактикалық шарасының өту барысы туралы ІІД-нің есірткіге қарсы күрес департаментінің басшысы əділет генерал-майоры Сұлтан Кусетов баяндады.
Арайлы Жақсылық.
