Жамбыл облысының әкімі Ербол Қарашөкеев Тараз қаласында салынатын жаңа футбол академиясының іргетасына капсула салу рәсіміне қатысты. Аймақ басшысы бұл жобаның өңір спорты үшін маңызы зор екенін атап өтті.
Облыс әкімі өз сөзінде жаңа нысанның жас таланттарды тәрбиелеуге арналған үлкен орталыққа айналатынын айтты.
«Бүгін – біз үшін тарихи әрі қуанышты күн. Әулие-Ата жерінде жаңа футбол дәуірінің басталуын бірге атап отырмыз. Бұл ғимарат – тек нысан ғана емес, болашақ чемпиондардың ордасы. Өңіріміз қазақ футболының қайнар бұлағы саналады, сондықтан бұл жоба жаңа буын футболшылардың жолын ашатын маңызды қадам», – деді Ербол Қарашөкеев.
Академияның капсуласын орналастыру салтанатына Қазақстан футбол федерациясының Бас хатшысы Давид Лория және «Halyk» қайырымдылық қорының атқарушы директоры Ғалымбек Жақсылықов қатысты. Олар академияның ел футболын дамытудағы рөліне тоқталып, оның республикалық деңгейдегі маңызды жоба екенін атап өтті.
Сонымен қатар футбол ардагері Георгий Хутиди мен «Тараз» футбол клубының танымал түлегі Нұркен Мәзбаев жобаны жүзеге асыруға қолдау көрсетіп жүрген азаматтарға өз алғыстарын білдірді.
3,5 млрд теңгелік жоба – болашақ чемпиондарға арналған орталық
Құны шамамен 3,5 млрд теңгені құрайтын жаңа футбол академиясында жасөспірімдердің кәсіби өсуі мен спорттық дамуына ерекше көңіл бөлінеді. Нысан заманауи жаттығу базасымен қамтамасыз етіледі, тәжірибелі жаттықтырушылар мен ғылыми-әдістемелік топ жұмыс істейтін болады.
Жас спортшылардың жайлы өмір сүруі үшін 100 орындық жатақхана салу жоспарланған.
Академия 2027 жылы ашылады
Жоспар бойынша футбол академиясы 2027 жылы пайдалануға беріледі. Жоба Қазақстан футбол федерациясы, «Halyk» қайырымдылық қоры және Жамбыл облысы әкімдігі арасындағы серіктестік аясында жүзеге асырылуда.
