ТАРАЗ. Тараз қаласының тұрғыны ХҚКО-дағы (ЦОНның) операторлардың аздығына шағымдануда. Видеодан көріп тұрғандарыңыздай, жұмыс істеп тұрған терезелер саны шектеулі, ал келушілер қарасы өте көп.
«Автоцонда бір ақ касса жұмыс істеп тұр жаңа номерге. Мына жақта 50 адам отыр. Сыртта тағы адамдар бар. Қызмет көрсету қалай сонда, түсінбейміз. Үлгермейсіңдер дейді. Әрине бір кассамен үлгермейді. Қалай дұрыстауға болады» дейді видео авторы.
Аталған мәселеге байланысты «Азаматтарға арналған үкімет» мемлекеттік корпорациясы» КЕАҚ Жамбыл облысы бойынша филиалы ресми жауап берді.
Кезек неден пайда болды?
Ведомствоның хабарлауынша, келушілер санының күрт артуына мемлекеттік тіркеу нөмірлік белгілерін еркін таңдау мүмкіндігін көздейтін жаңа норманың енгізілуі себеп болған. Статистикалық мәліметтерге сүйенсек, Тараз қалалық №2 МХҚКО арқылы 2026 жылдың 5 қаңтарынан бүгінгі күнге дейін 3000-ға жуық өтінім қабылданған.
Мәселені шешу үшін қандай шаралар қабылданды?
Филиал басшылығы қалыптасқан жағдайды реттеу үшін шұғыл шаралар қабылданғанын мәлімдеді:
- Қосымша мамандар: Азаматтарды қабылдау үшін әдеттегі терезелер санына қосымша 3 терезе қосылып, тиісті мамандар жұмысқа тартылды.
- Төлем оңайландырылды: Кассадағы кезек пен уақыт шығынын азайту үшін балама ретінде QR-код арқылы төлем қабылдау жүйесі іске қосылды.
- Онлайн қызмет: Мамандар бұл қызмет түрін МХҚКО-ға келмей-ақ, онлайн форматта алуға болатынын ескертеді. Бұл азаматтардың уақытын айтарлықтай үнемдеуге мүмкіндік береді.
Түсіністікпен қарауды сұрайды
«Барлық қызметтер ҚР Ішкі істер министрлігінің бекітілген ережелеріне сәйкес көрсетіледі. Қызметкерлер азаматтарға мүмкіндігінше жедел әрі сапалы қызмет көрсету үшін бар күшін салуда. Осыған байланысты уақытша қолайсыздықтарға түсіністікпен қарауларыңызды сұраймыз», — делінген ресми хабарламада.
Turaninfo.kz редакциясы: Егер сізде де мемлекеттік қызмет алу барысында туындаған мәселелер болса, біздің редакцияға хабарласа аласыздар.
