2026 жылғы 6 қаңтарда Гвардейск гарнизонындағы әскери бөлімдердің бірінде мерзімді қызметтегі әскери қызметші қатардағы Т.-ның қатысуымен оқиға болған.
Таңғы тексеру кезінде казарма алдында әскери қызметші сол қолының саусақтарын металл затпен жарақаттап алған. Зардап шеккен әскери қызметші дереу әскери госпитальға жеткізіліп, оған уақытында медициналық көмек көрсетілді. Қазір оның жағдайы тұрақты, өмірі мен денсаулығына еш қауіп жоқ, дәрігерлердің тұрақты бақылауында.
Зардап шеккеннің айтуынша, бұл әрекет жеке басындағы себептерге байланысты жасалған және әскери борышты өткерумен, сондай-ақ әскери бөлім командирлерінің немесе лауазымды тұлғалардың іс-әрекеттерімен байланысы жоқ. Телеграм каналында айтылғандай, тікелей басшының ескертуінен кейін жарақат болғаны туралы ақпарат шындыққа сәйкес келмейтінін ескертеміз.
Аталған факт бойынша қылмыстық іс қозғалды. Қазақстан Республикасы Ішкі істер министрлігінің Оңтүстік өңірлік әскери-тергеу басқармасының Гвардейск бөлімі оқиғаның барлық мән-жайын жан-жақты әрі объективті анықтауға бағытталған тергеу шараларын жүргізуде. ҚР Құрлық әскерлері Бас қолбасшысының тапсырмасы бойынша оқиға орнына оның тәрбие және идеологиялық жұмыс жөніндегі орынбасары бастаған арнайы комиссия жіберілді. Жағдай Құрлық әскерлері қолбасшылығының қатаң бақылауында.
ҚР Құрлық әскерлерінің баспасөз қызметі БАҚ және әлеуметтік желі қолданушыларын ресми тергеу аяқталғанға дейін болжамды немесе жалған мәліметтерді таратудан, сондай-ақ асығыс қорытынды жасаудан бас тартуға шақырады.
Жалған ақпарат таратқан үшін ҚР заңнамасына сәйкес жауапкершілік қарастырылғанын ескертеміз.
ҚР Құрлық әскерлерінің баспасөз қызметі
