Бұл жоба қала тұрғындары мен қонақтарын ерекше көңіл күйге бөлеп, ертегі әлеміне саяхаттауға мүмкіндік жасайды. Қалада иллюминациялар, арнайы тақырыптағы инсталляциялар, мұз айдындары мен жайлы қоғамдық кеңістіктер әзірленді, деп хабарлайды елорда әкімдігінің ресми сайты.
Коньки тебу алаңдары, сырғанақтар, шағын сәулет формалары, фотоаймақтар және басқа да элементтер бойынша монтаж жұмысы желтоқсанның басында басталды. Жұмыс желтоқсанның екінші онкүндігінде кезең-кезеңімен аяқталады.
19 желтоқсан күні сағат 18:00-де елорданың алты ауданында бір уақытта 40-тан астам жаңа жылдық шыршаның шамы жағылады. Барлық жерде – мұз айдындарында, сырғанақтарда, фотоаймақтарда және т.б. орындарда әртүрлі ойын-сауықтар бағдарламалары күтіліп отыр. Концерттік бағдарламалар барлық ірі орында сағат 17:30-дан бастап өтеді.
Нұра ауданында Жаңа жыл шыршалары 11 жерде орнатылады.
Ауданның 25 метрлік шыршасы «Астана Арена» стадионының тұрағына орнатылады. Елорда тұрғындары мен қонақтары үшін мерекелік бағдарлама мен жаңа жылдық ойын-сауық, оның ішінде коньки тебу алаңдары, сырғанақтар және фотоаймақтар дайындалды. Бұл жерде сағат 17:30-дан бастап балаларға арналған концерттік бағдарлама мен интерактивті іс-шаралар өтеді, ал шырша шамын жағу алдында дрон шоуы ұйымдастырылады.
Орталық саябақта 213 метр болатын дөңгелек сырғанақ алаңы, мұз айдындары, фотоаймақтар және безендірілген арка, арба және «Аю отбасы» шам инсталляциясы сияқты шағын сәулеттік элементтер бар. Саябақтың орталық кіреберісінде 24 метрлік шырша орнатылып, 19 желтоқсанда шамы жағылады.
Ғашықтар саябағында сауда павильондары мен коньки тебу алаңы, жарықтандырылған аркалар, мерекелік стильде безендірілген «Менің бақытым» мүсіні және бұғылар, қояндар, аюлар, камин және арба бейнеленген арнайы тақырыптағы шағын сәулеттік элементтер бар. Әйтеке би көшесіндегі аллеяда және «Бухарест» саябағында жарық инсталляциялары мен фотоаймақтар орнатылды, оның ішінде «Пряник адамдар», «Үйшіктер», «Бұғылар отбасы» және «Ойыншық» сияқты композициялар, сондай-ақ тұрғындар мен қонақтар естелік фотосуреттерге түсе алатын «Қыз бен бала» және «Сиқырлы шар» сияқты шағын сәулеттік элементтер бар.
Үркер елді мекенінде сыйлық, пойыз және әткеншек түрінде шағын сәулет элементтері орнатылған коньки тебу алаңы мен сырғанақ орындары жоспарланған. Сондай-ақ, аумақты шырша безендіріп тұрады.
Сонымен қатар, бұл күні Green Mall, «Сарыарқа», «Keruen City», «Азия Парк», «Хан Шатыр» және басқа да сауда және ойын-сауық орталықтарының іргелес аумақтарында биіктігі 7 метрден 14 метрге дейінгі шыршалар жарықтандырылады.
Алматы ауданында Жаңа жыл шыршаларының шамы төрт жерде жағылады, олардың әрқайсысы ертегі стилінде безендірілген.
Ақбұлақ өзенінің жағалауына биіктігі 25 метрлік шырша орнатылады. Аудан бойынша ергежейлілер мен қоян фигуралары, сәндік камин, сандықтар, жарықтандырылған ағаштар және арнайы фотоаймақтар сияқты тақырыптық ландшафтар орнатылады. Бұл серуендеуге және есте қаларлық фотосуреттер түсіруге арналған ерекше сиқырлы көңіл күй сыйлайды. Шырша шамын жағу күні бұл жерлерде мерекелік отшашу өтеді.
«Жерұйық» саябағының орталық бөлігінде диаметрі 80 метр болатын дөңгелек коньки тебу алаңы, мұз сырғанағы және екі шынайы шырша болады. Саябақтың кіреберісінде жарықтандырылған фотоаймақтар, екі жарықтандырылған сарай және сәндік сахна жарықтандыру жүйесі бар «2026» ландшафты орнатылады.
Қажымұқан Мұңайтпасов көшесіндегі Колизей баскетбол алаңында жаңа жыл шыршасы және «Мұзды өлке» мультфильмінен көрініс тапқан тақырыптық ландшафт элементтері, оның ішінде арба, екі сәндік шам, аққала мен Эльза фигуралары орнатылды. Қошқарбаев даңғылы, 80/1 мекенжайына шырша, жарық аркалары, сәндік шарлар және жануарлар фигуралары, сондай-ақ мұз сырғанағы орнатылды.
Алматы ауданындағы Теміржолшылар елді мекенінде де мерекелік орын әзірленеді. Мұнда жаңа жыл шыршасы, мұз айдыны және тақырыптық ландшафт элементтері орнатылады.
Астана әкімдігі
