Байзақ ауданы әкімдігінің білім бөлімінің «Балалар шығармашылығы және тәрбие орталығы» КММ-нің әлеуметтік тапсырысы аясында «Ақ сұңқар» жастар қоғамдық бірлестігінің ұйымдастыруымен Қызыл Жұлдыз орта мектебінде «Адал ұрпақ» еріктілер клубының мүшелерімен рухани – адамгершілік және азаматтық патриоттық бағытында «Ертеңіме cенемін!» атты семинар өткізілді.
Кездесуге «Ақ сұңқар» жастар қоғамдық бірлестігінің төрағасы Абзал Есіркепов қатысып, бүгінгі таңдағы басты мәселелердің бірі жастар арасындағы жұмыссыздық мәселесі туралы ой өрбітті. Ол өз сөзінде Аталған мәселе мемлекеттің өзін ойландырып отырған проблема екенін тілге тиек етіп, бұл тұрғыда ел үкіметі бірқатар бағдарламаларды іске асырып жатқанын сөз етті. Дегенмен олардан ауыл жастарының хабары аздау. Осындай мәселелерді алға тартқан А.Есіркепов біршама ақпараттар айтып, жастарға арналған бағдарламалар туралы хабардар етті. Сондай-ақ мамандық таңдау туралы өз тәжірибесімен бөлісіп, бірқатар мәліметтер келтірді. Шара барысы еркін пікір алмасуға ұласып, қатысушылар өздерінің ойларын ортаға салды. Сонымен қатар қоғамдық бірлестік төрағасына сұрақтар қойып, тұшымды жауаптар алды.
