Жиында алғашқы қоңырау соғылып, өнерлі өрендердің ән-шашуы мен мерекелік қойылымдары көрерменге көтеріңкі көңіл күй сыйлады.
Өңір басшысы ұстаздарды, оқушыларды, ата-аналарды және барша білім саласының жанашырларын жаңа оқу жылының басталуымен құттықтап, ізгі лебізін білдірді.
– Ұлы Абай «Ғылым таппай мақтанба» деп, адамзаттың кемелдікке бастайтын жолы – білім мен ақыл-парасат екенін меңзесе, Ахмет Байтұрсынұлы «Мектеп – баланың келешегіне ашылған алтын қақпа» деп, білім ошағының маңызын терең түсіндірген. Осы ұлы тұлғалардың өсиетін ту ете отырып, балаларды сапалы білім мен саналы тәрбиеге баулу – баршамыздың ортақ міндетіміз, – деді облыс әкімі.
Ербол Қарашөкеев өз сөзінде өскелең ұрпаққа артылар сенім мен үміттің зор екенін атап өтті. Ол балаларға оқуда озат, еңбекте тиянақты, өмірде табанды болуға тілек білдірді.
– Ұстаз – ұрпақ тәрбиесінің алтын діңгегі, мектептің жүрегі. Мемлекет басшысы мұғалімдерге артылған сенім мен жауапкершіліктің маңызын үнемі ерекше атап өтеді. Әлемде сан түрлі мамандық бар. Бірақ ұстаздық – жүрек жылуын төгіп, рухани биікке бастайтын қасиетті қызмет. Мамандыққа адалдық танытып жүрген ұстаздарға шын жүректен алғысымды білдіремін! – деді аймақ басшысы.
Сондай-ақ облыстағы білім беру ұйымдарының материалдық-техникалық базасы жүйелі түрде нығайтылып келе жатқанына да тоқталды. Жаңа білім беру нысандары бой көтеріп, үш ауысымды, апатты жағдайдағы және оқушы орны тапшы мектептердің мәселелері кезең-кезеңімен шешіліп жатқанын жеткізді.
Қазіргі таңда 26 білім беру нысанының құрылысы жүргізілуде. Жыл соңына дейін 10 жаңа мектеп пен 5 мектептің жапсарлас ғимаратының құрылысы аяқталады. Қалған 11 нысан 2026 жылы толық пайдалануға берілмек.
Президент тапсырмасына сәйкес өңірде 66 мектепті қайта жаңғырту міндеті тұр. Биыл 10 білім ошағында ауқымды жөндеу жұмыстары жүргізілуде.
Шара барысында облыс әкімі «Келешек мектептері» ұлттық жобасы аясында бой көтерген білім ошағын аралап көрді.
Сондай-ақ 1-сынып оқушыларымен кездесіп, бүлдіршіндергі ақ жол тіледі.
