«Almaz Medical Group» ЖШС-і Жамбыл филиалының жаңадан ашылған эндокринологиялық орталығында қалқанша безін хирургиялық емдеу бойынша екі күндік шеберлік сыныбы өтті. Нұр-Сұлтан қаласынан келген Ұлттық ғылыми онкологиялық орталығының эндокриндік патологияларды хирургиялық емдеуге маманданған медицина магистрі, эндокриндік хирург Дулат Серікбайұлының еміне тіркелген эндокринологиялық орталықтың пациенттері алдын-ала ультрадыбыстық зерттеудің бақылауымен қалқанша без түйіндерінің жіңішке инелі биопсиясы алынатын цитологиялық зерттеуден, сондай-ақ эндокринолог, онколог және хирург дәрігерлердің кеңестерінен тұратын операцияға дейінгі тексерілулерден өтіп, дайындалды.
Тәулік бойы стационарда Дулат Серікбайұлы медициналық орталықтың бас дәрігері Нұртуған Әлқуатовпен бірге түйінді зобы, аутоиммунды тиреодит-гемитиреодэктомия және тиреоидэктомиясы бар (тілімді немесе қалқанша безді алып тастау) үш пациентке ота жасады. Жаңа тәсілмен, бұрын-соңды қолданылмаған амалдар жасалынған операция білікті де білімді, осы сала бойынша шет мемлекеттерде тәжірибе жинақтаған мамандардың қолынан сәтті аяқталып, ұзақ уақыттан бері жанын жеп келе жатқан сырқаттан зардап шегіп келе жатқан науқастардың жағдайы тез-ақ жақсарып сала берді. Бүгінде ауруханадан шығаруға дайындалуда.
Сонымен қатар, астаналық маман эндокринолог Э.Д.Каримов, онколог- маммологтары К.В.Халидов, Р.Р.Мендубаевпен және ультрадыбыстық зерттеу дәрігері А.Д.Абдурасиловамен бірлесіп, қалқанша безінің аурулары бойынша шағымданатын науқастарға кеңестер беріп, ультрадыбыстық зерттеудің бақылауымен қалқанша безінің түйіндеріне жіңішке инелі биопсия жасап, сырқат түрін анықтап, тиісті ем-шаралар туралы кеңестер берді.
Бүгінде эндокринологиялық орталық қалқанша безінің патологиясы бар пациенттерді қабылдап, бейінді мамандардың кеңесі мен диагностикасын өткізіп, жоспарлы, жедел емдеу жүргізуді бастап кетті.
Жамбыл облысы әкімдігінің денсаулық сақтау басқармасының баспасөз қызметі
