Әуе көлігінде музыкалық аспаптарды тасымалдау тәртібі өзгереді, енді домбыра мен қобызға арнайы норма бекітілмек, деп хабарлайды Orda.kz.
Тиісті түзетулерді Көлік министрлігі әзірлеп жатыр.
Жобаға сәйкес, азаматтардың өтініштері ескеріле отырып, алғаш рет нормативтік деңгейде музыкалық аспаптарды, соның ішінде домбыра мен қобызды, әуе кемесінің салонында қол жүгi ретінде тасымалдау құқығы бекітіледі.
Жаңа талап бойынша:
- музыкалық аспап футлярда болуы тиіс;
- өлшемі 110×35×30 см-ден аспауы керек;
- салмағы 10 келіден артық болмауы қажет.
Егер жолаушы тек бір музыкалық аспапты алып жүрсе, ол қосымша ақысыз қол жүгi ретінде тасымалданады. Ал аспап қол жүгінің қосымша бірлігі ретінде есептелген жағдайда немесе белгіленген нормадан асса, әуе компанияларының қолданыстағы тарифтеріне сәйкес ақы алынуы мүмкін.
Министрлік бұл өзгерістердің мақсаты жолаушылар құқықтарын қорғау және әуе тасымалы саласындағы ережелерді нақтылау екенін атап өтті.
Түзетулерді қабылдау мерзімі — 2026 жылдың мамыр айының соңына дейін жоспарланып отыр.
Қазақстан Республикасы көлік министрлігі «Жолаушыларды, багажды және жүктерді әуе көлігімен тасымалдау қағидаларын бекіту туралы» Қазақстан Республикасы Инвестициялар және даму министрінің 2015 жылғы 30 сәуірдегі № 540 бұйрығына өзгерістер мен толықтырулар енгізеді.Жоба аясында азаматтардың көптеген өтініштері негізінде, алғаш рет нормативтік деңгейде жолаушылардың музыкалық аспаптарды (оның ішінде домбыра мен қобызды) футлярда әуе кемесінің салонында қол жүгi ретінде тасымалдау құқығы бекітіледі. Бұл ретте олардың өлшемдері 110×35×30 см-ден, ал салмағы 10 кг-нан аспауы тиіс.
Аталған түзетулерге сәйкес, егер жолаушы тек бір музыкалық аспапты, мысалы домбыраны, алып жүрсе, оны тасымалдау қол жүгі ретінде тегін жүзеге асырылады. Ал музыкалық аспап қол жүгінің қосымша бөлігі ретінде тасымалданған жағдайда, белгіленген нормадан асатын жүк үшін әуе компаниялардың қолданыстағы қағидаларына сәйкес ақы алынады.
Бұл түзетулерді қабылдау жолаушылардың құқықтарын қорғау деңгейін арттыруға және әуе көлігінде музыкалық аспаптарды тасымалдауды реттеуді жетілдіруге бағытталған.
Түзетулерді қабылдаудың болжамды мерзімі – 2026 жылғы мамыр айының соңына дейін.
