Бір отбасы баласының тісін емдетуге көмек сұрады. Екінші отбасы ерекше қажеттілігі бар баласына инватакси іздеп келді. Тағы бір ата-ана баласын басқа мектепке ауыстыруды, енді бірі ПМПК-ға қажетті құжаттарды рәсімдеуді сұрады. Ал кей өтініштердің артында алимент, жұмыссыздық, банк шоттарының бұғатталуы сияқты отбасының өзге де мәселелері тұр.
Бұл өтініштер Жамбыл облысында өткен «Қазақстан балалары» ұлттық бағдарламасы аясында «Әділет» партиясының республикалық Ашық есік күнінде айтылды.
Қағаз жүзінде бұл әртүрлі мәселелер. Бірақ ата-аналардың айтқанына қарасақ, олардың барлығы бір жерден түйіседі: балаға қажет көмекті алу кейде бір ғана мекемеге жүгінумен шешіле бермейді.
Сондықтан бұл жолғы қабылдауға партия өкілдерімен бірге денсаулық сақтау, білім беру, жұмыспен қамту және әлеуметтік қорғау салаларының мамандары, бала құқықтары жөніндегі уәкілдер, заңгер мен психолог қатысты. Мақсат азаматты бір кабинеттен екіншісіне жіберу емес, көтерілген мәселенің қай тұста шешілетінін сол жерде анықтау болды.
Мұны нақты өтініштерден де көруге болады.
Ата-аналардың бірі баласының тісін емдетуге көмек сұрады. Мәселе денсаулық сақтау мамандарымен бірге қаралып, баланың стоматологиялық көмекті тегін алу мүмкіндігі нақтыланды. Яғни ата-ана үшін ең маңыздысы болған сұраққа қабылдаудың өзінде жауап табылды.
Екі отбасы ерекше қажеттіліктері бар балаларына инватакси қажет екенін айтты. Олардың өтініштері бойынша жауапты мамандарға нақты тапсырмалар беріліп, балаларды қажетті қызметпен қамту жолдары белгіленді.
Тағы бір ата-ана баласының мүгедектігін рәсімдеу және қамқоршылыққа алу мәселесімен келді. Мұнда да мәселе тек жалпы кеңеспен шектелмей, қажетті құжаттар мен рәсімдердің тәртібі түсіндірілді.
Баланың білім алуына қатысты өтініштер бірнеше бағытты қамтыды. Бір ата-ана баласын балабақшаға орналастыру мәселесін көтерсе, енді бірі ПМПК-ға қажет құжаттарды рәсімдеуге көмек сұрады. Ал бір отбасы балаларын басқа мектепке ауыстыруды өтінді. Нәтижесінде балаларды каникул кезінде №5 мектепке ауыстыру жөнінде келісім жасалды.
Мектепке дайындық мәселесімен келген отбасы да көмексіз қалған жоқ. Балаларға қажетті оқу құралдары мен киім-кешек алып беру ұйымдастырылды.
Қабылдауда отбасының тұрмысы мен құқықтық жағдайы да сөз болды. Алимент өндіру, баланың ата-анасының бірінде қалуы, ажырасу кезінде мүлікті бөлу, жұмысқа орналасу, банк шоттарының бұғатталуы және тұрғын үй мәселелері көтерілді.
Бұл жерде баланың мәселесін отбасының басқа проблемаларынан бөліп қарау қиын. Мысалы, ата-ананың тұрақты жұмысы болмаса, оның салмағы отбасының табысына ғана емес, баланың қажеттілігіне де түседі. Ал ата-аналар арасындағы құқықтық дау баланың тұрмысына немесе онымен араласу мүмкіндігіне әсер етуі мүмкін.
Сондықтан мұндай өтініштер бойынша заңгер мен әлеуметтік сала мамандары нақты жағдайға қарай қажетті рәсімдер мен қолдау тетіктерін түсіндірді.
Жамбылдағы бұл қабылдау өңірдегі балаларға қатысты мәселелердің тек бір күндік тізімі емес екенін де көрсетті. Облыста 6 932 мүгедектігі бар бала бар. Балаларға оңалту және абилитация қызметтерін көрсетуге биыл 9,3 млрд теңге қарастырылған. Ал мектепке дейінгі тәрбие бағытында 661 ұйым жұмыс істеп, 2–6 жастағы балаларды қамту 98,9 пайызды құрап отыр.
Дегенмен ата-ана үшін статистикадан бұрын өз баласының нақты қажеттілігі маңызды. Біріне ем қажет, біріне арнайы көлік, біріне балабақшадағы орын немесе мектеп ауыстыру мүмкіндігі керек. Осы тұрғыдан алғанда, қоғамдық қабылдау нақты отбасының мәселесін жалпы көрсеткіштердің арасынан бөліп алып, оның шешілу жолын іздейтін алаң ретінде маңызды.
«Әділет» партиясы Жамбыл облыстық филиалы Әйелдер қанатының жетекшісі Айман Әшімова қабылдаудың осы жағына тоқталды.
«Баланың мәселесін бір ғана саланың шеңберінде қарау жеткіліксіз. Сондықтан қабылдауда әр өтініш бойынша тиісті мамандарды қатыстырып, мәселенің нақты шешу жолын бірге анықтауға басымдық бердік. Бастысы – әр өтініштің нәтижесі болуы», – деді Айман Әшімова.
Ашық есік күні бойынша бірқатар өтініштің шешімі сол жерде нақтыланды. Бір бала стоматологиялық көмек алатын болды, екі отбасы инватакси қызметімен қамтылады, балаларды №5 мектепке ауыстыру жөнінде келісім жасалды, тағы бір отбасының балалары мектепке қажетті заттармен қамтамасыз етіледі.
