Медициналық инфрақұрылымды жаңғырту, диагностикалық қызметтердің қолжетімділігін арттыру және медицина мамандарын қолдау – Жамбыл облысының алдағы бес жылдағы денсаулық сақтау саласын дамыту басымдықтарының қатарында. Бұл мәселелер Жамбыл облыстық көпбейінді ауруханасында өткен кездесуде талқыланды.
«Әділет» партиясының кандидаттары Ерғали Әбуғалимен Нұрлан Сапарбеков медицина қызметкерлерімен кездесіп, 2026–2031 жылдарға арналған «Әділетті болашақ үшін» өңірлік сайлауалды бағдарламасының денсаулық сақтау саласына қатысты негізгі міндеттерін таныстырды.
Кездесу барысында медициналық ұйымдардың материалдық-техникалық базасын нығайту, тозығы жеткен нысандарды жаңғырту, заманауи диагностикалық қызметтерді дамыту және медициналық көмектің қолжетімділігін арттыру мәселелеріне басымдық берілді.
Бағдарламаға сәйкес, 2031 жылға дейін облыста 6 жаңа медициналық нысан салу, жұмыс істеп тұрған 2 нысанға жапсарлас ғимарат тұрғызу, 5 тозығы жеткен корпусты қайта жаңғырту және 17 нысанды жөндеу жоспарланған.
Сонымен қатар Тараз қаласы мен Қордай ауданында алғашқы медициналық-санитарлық көмек ұйымдарының базасында 2 инвазивті емес диагностика орталығын ашу көзделген. Әр орталық 150 мың тұрғынға шақталып жоспарланған. Бұдан бөлек, 1 миллионнан астам ауыл тұрғынын жылжымалы медициналық кешендердің қызметімен қамту міндеті қойылған.
«Ауыл тұрғындары үшін медициналық көмектің қолжетімді болуы ерекше маңызды. Жылжымалы медициналық кешендер шалғай елді мекендердегі халыққа қажетті медициналық қызметтерді жақындатуға мүмкіндік береді. Бағдарламада халықтың күтілетін өмір сүру ұзақтығын 2025 жылғы 76 жастан 2031 жылға қарай 78,1 жасқа дейін арттыру мақсаты да қарастырылған», – деді кандидат Ерғали Әбуғали.
Кездесуде медицина қызметкерлерін әлеуметтік қолдау мәселесі де назардан тыс қалған жоқ. Бағдарлама аясында 215 медицина маманына тұрғын үймен қамтамасыз ету, ынталандыру төлемдері, көтерме жәрдемақылар және коммуналдық қызметтер мен ұялы байланыс шығындарын өтеу сияқты қосымша шараларды қамтитын біржолғы әлеуметтік көмек көрсету көзделген. Сондай-ақ резидентурадағы нысаналы гранттарға кемінде 1,5 млрд теңге бағыттау жоспарланған.
Кандидаттар денсаулық сақтау саласының дамуы заманауи инфрақұрылыммен қатар, білікті мамандардың кәсіби әлеуетіне де байланысты екенін атап өтті. Осы орайда медицина қызметкерлерінің ұсыныстары мен тәжірибесін ескеру, олардың еңбек жағдайын жақсарту және кадр тапшылығын шешу маңызды екені айтылды.
Өз кезегінде аурухана ұжымы саладағы өзекті мәселелерді көтеріп, медициналық қызмет сапасын арттыру, емдеу мекемелерінің жұмысын жетілдіру және мамандарға қолайлы жағдай жасау жөнінде ұсыныстарын білдірді. Кандидаттар қойылған сұрақтарға жауап беріп, өңірлік сайлауалды бағдарламада қарастырылған міндеттер бойынша түсініктеме берді.
Кездесу ашық пікір алмасу форматында өтіп, медицина саласының өкілдеріне өңірлік даму жоспарларын талқылауға және өз ұсыныстарын жеткізуге мүмкіндік берді. «Әділет» партиясының сайлауалды бағдарламасындағы денсаулық сақтау бағытының түпкі мақсаты – медициналық көмектің сапасы мен қолжетімділігін арттырып, тұрғындардың өмір сүру ұзақтығы мен сапасын жақсарту.
Дайындаған: «Әділет» партиясы Жамбыл облыстық филиалының баспасөз қызметі.
Тапсырыс беруші: Д. А. Каипов.
Жамбыл облыстық мәслихаты депутаттарының сайлауында партиялық тізімді ұсынған «Әділет» партиясы» қоғамдық бірлестігінің сайлау қоры қаражатынан төленді.







