Денсаулық сақтау жүйесінің сапасы бойынша Қазақстан Ресей мен Беларусь секілді ТМД елдерін басып озып, 58-орынға тұрақтады.
Денсаулық сақтау жүйесінің сапасы бойынша 2021 жылдың бірінші жартыжылдығында Қазақстан 95 елдің ішінде 58-ші орынға ие болды деп жазады Ranking.kz Numbeo рейтингіне сілтеме жасап. Елдің индексі 59,62 құраған. Индекс 100-ге жақын болған сайын, елдің денсаулық сақтау жүйесі соғұрлым жақсы деп саналады. Оны есептеу кезінде жабдықтың, персоналдың, дәрігерлердің сапасы, қызметтердің бағасы және т.б. бағаланады.
Қазақстан ТМД елдерінің ішінде Ресей, Украина, Беларусь және Әзірбайжанға қарағанда жақсы көрсеткіштерге ие болып отыр. Рейтингтің көшбасшылары Тайвань, Оңтүстік Корея және Франция болса, соңғы орынды Венесуэла алған.
2021 жылдың бірінші тоқсанында денсаулық сақтау саласында 546,4 млрд теңгеге қызметтер көрсетілген, бұл 2020 жылдың сәйкес кезеңімен салыстырғанда ақшалай түрде 47,2%-ға артық.
Аймақтар жағдайында көрсетілген қызметтердің көп бөлігі Алматыға тиесілі: 93,8 миллиард теңге, бұл өткен жылмен салыстырғанда 46%-ға артық. Үздік үштікті Нұр-Сұлтан (71,1 млрд теңге) мен Алматы облысы (45,1 млрд теңге) аяқтайды. Қызметтердің ең аз көлемі Солтүстік Қазақстан облысына түсті: 15 миллиард теңге.
Биыл бюджет есебінен 429,8 миллиард теңгеге қызметтер көрсетілгені белгілі болды. Бұл өткен жылмен салыстырғанда 46,7%-ға артық. Азаматтар өздері үшін төлеген қызметтер көлемі 31,5%-ға, 65,9 млрд теңгеге дейін өсті; кәсіпорындар есебінен — 81,5%-ға өсті, 50,7 млрд теңгеге дейін. Қызмет түрлері тұрғысынан 285,3 млрд теңге ауруханалардағы қызметтерге, 113,9 млрд теңге жалпы дәрігерлік практика саласындағы қызметтерге, 34,7 млрд теңге арнайы медициналық практика саласындағы қызметтерге, 15,4 млрд.теңге стоматология саласында қызметтерге жұмсалған.
Автор: Азамат Қабетов Тағы да оқыңыздар: https://kaz.nur.kz/society/1921651-qazaqstan-densaulyq-saqtau-zuiesinin-sapasy-boiynsa-resei-belarus-zane-ukrainany-basyp-ozdy/
