Бұған дейін АҚШ-та NB.1.8.1 деп аталатын жаңа коронавирус штамы таралып жатқаны хабарланған болатын. Мамандардың айтуынша, бұл жаңа штам бұрынғыларға қарағанда жұқпалырақ. Ол алғаш рет биылғы жылдың қаңтар айында Қытайда анықталған.
Сонымен қатар, Санитарлық-эпидемиологиялық бақылау комитеті елімізде аурушаңдыққа және әлемдегі эпидемиологиялық жағдайға апта сайын мониторинг жүргізіліп жатқанын мәлімдеді.
«Қазақстан Республикасында коронавирус инфекциясы бойынша эпидемиологиялық жағдай тұрақты. Жыл басынан бері 362 жағдай тіркелді. Өткен жылдың осы кезеңімен салыстырғанда аурушаңдық деңгейі 3,4 есеге төмендеді, өлім жағдайлары тіркелген жоқ. Ауру жеңіл түрде өтіп жатыр, науқастар амбулаториялық жағдайда ем қабылдауда», – делінген хабарламада.
Сондай-ақ, ведомство вирустар мен олардың түрлі нұсқаларының айналымына тоқсан сайын мониторинг жүргізілетінін атап өтті.
«Биыл жүргізілген зертханалық мониторинг нәтижелері бойынша Қазақстан Республикасында анықталған жағдайлардың 100 пайызында омикрон нұсқасының JN.1 қосалқы түрлері – LF.7.1.3, LP.8.1, LF.7.6 және KP.3.1.1 айналымда екені анықталды», – делінген ақпаратта.
