Жамбыл облысының әкімі Бердібек Сапарбаев азаматтарды жеке мәселелері бойынша қабылдау өткізді. Карантиндік шектеулерге байланысты облыс тұрғындарының аймақ басшысымен диалогы онлайн форматта ұйымдастырылды.
Мойынқұм ауданының тұрғыны Шакизат Акимов екі мәрте Социалистік Еңбек Ері Жазылбек Қуанышбаевтың құрметіне Мойынқұм ауылының атын өзгертуді ұсынды. Еске сала кетейік, биыл дала академигі атанған данқты шопанның туғанына 125 жыл толып отыр. Ал, тараздық Нарейім Сейдалиев «Ғылыми-клиникалық кардиохирургия және трансплантология орталығы» ЖШС директоры Сейтхан Жошыбаевқа «Қазақстанның Еңбек Ері» атағын беру туралы бастама көтерді.
Сол секілді, Тараз қаласының тұрғыны Мұрат Сағындықов «Омарова» шаруа қожалығындағы инфрақұрылым мәселесін шешуге көмек сұрады.
Қабылдау барысында «Новоджамбулец» саяжай кооперативінің тұрғындары да аймақ басшысына жүгінді. Олар саяжай кооперативіне елді мекен мәртебесін беруді сұрады. Айта кетейік, саяжай кооперативі Жамбыл ауданының Қызылшарық және Бектөбе ауылдарының маңында орналасқан.
Бұдан бөлек, кездесуде медициналық қызмет көрсету жайы талқыланды.
Бердібек Сапарбаев барлық көтерілген ұсыныстар мен өтініштер назардан тыс қалмайтынын, олар заң аясында жан-жақты зерделеніп, жауап нақты адресаттарға жолданатынын жеткізді.
Жамбыл облысы әкімінің баспасөз қызметі
