Бүгін Астана медицина университетінің (АМУ) қабырғасында Радиобиология және радиациядан қорғау институтының базасында «Уран өндіруші аймақтардағы медициналық-биологиялық және экологиялық мәселелер» тақырыбында IX Республикалық ғылыми-тәжірибелік конференция басталды.
Конференция жұмысына Қазақстан Республикасы Денсаулық сақтау вице-министрі – Бас мемлекеттік санитарлық дәрігер Айжан Есмағамбетова, сондай-ақ АМУ Радиобиология және радиациядан қорғау институты тығыз қарым-қатынас орнатқан Ресей, Жапония, Франция және басқа елдердің ғылыми-зерттеу орталықтары мен университет өкілдері қатысып жатыр.
Күн тәртібінде радиоэкологиялық ахуал, радиациялық қауіпті объектілер қызметінің теріс факторлары әсер ететін аймақтарда тұратын қызметкерлердің радиациялық қауіпсіздігі мен халықтың денсаулығына қатысты өзекті мәселелер талқыланбақ.
Өз сөзінде Айжан Есмағанбетова университеттің Радиобиология және радиациядан қорғау институтының ғалымдары мен мамандары айналысып жатқан мәселе ғылыми тұрғыдан ғана емес, практикалық тұрғыдан да өте өзекті екенін атап өтті.
«Жүргізілген зерттеулер халықтың радиациялық қауіпсіздігін қамтамасыз ету үшін заңнамалық базаның, санитарлық-гигиеналық талаптардың болуына қарамастан, уран кен орындарында әлі де болса жергілікті проблемалардың бар екенін және олар жүйелі зерттеулерді қажет ететінін көрсетті», – деді вице-министр.
Өз кезегінде Астана медицина университетінің ректоры Қамалжан Надыров тұрақты радиациялық бақылауды қажет ететін уран мен мұнай өндіруші кәсіпорындар көп болғандықтан, Қазақстан үшін халықты радиациялық қауіптен медицина тұрғыдан қамтамасыз ету мәселесінің өзектілігіне тоқталды.
Осы орайда Радиобиология және радиациядан қорғау институтының ғалымдары мен мамандары министрліктер мен ведомстволар ұсынған 15 ғылыми-техникалық бағдарлама мен ғылыми грантты сәтті аяқтағанын атап кеткен жөн.
Конференция қатысушылары сондай-ақ институттың табысты дамуына оның директоры – медицина ғылымдарының докторы, Қазақ педагогика ғылымдары академиясының академигі Қазымбет Полат Қазымбетұлының сіңірген еңбегі зор екенін атап өтті.
Полат Қазымбетұлы Нью-Йорк Ғылым академиясының (АҚШ) толық мүшесі, Радиациялық зерттеулер қауымдастығының вице-президенті, Халықаралық зерттеулер қауымдастығының консулы және МАГАТЭ сарапшысы.
Конференция барысында П.Қазымбетке «Ұлттық ғылыми медицина орталығының» құрметті профессоры атағы берілді.
