Қазақстан Республикасы Президенті Қасым-Жомарт Тоқаев Құрылтай депутаттарының сайлауын тағайындау туралы Жарлыққа қол қойды.
Мемлекет басшысының 2026 жылғы 1 шілдедегі №1338 Жарлығына сәйкес, Қазақстан Республикасы Конституциясының 46-бабының 3) тармақшасы мен 95-бабының 1-тармағына сәйкес Құрылтай депутаттарының сайлауы 2026 жылғы 23 тамызға белгіленді.
Жарлыққа сәйкес, Қазақстан Республикасының Орталық сайлау комиссиясына Құрылтай депутаттарын сайлауға дайындық жұмыстарын ұйымдастырып, оны өткізуді қамтамасыз ету тапсырылды.
Сонымен қатар, Үкіметке, Астана қаласының, облыстар мен республикалық маңызы бар қалалардың әкімдеріне сайлауды ұйымдастырушылық, материалдық-техникалық және қаржылық тұрғыдан қамтамасыз ету үшін барлық қажетті шараларды шұғыл қабылдау жүктелді.
Құжат ресми жарияланған күннен бастап күшіне енді.
