Бұл жаңашылдық еліміздегі этномәдени бірлестіктердің құқықтық мәртебесін, олардың атауына қойылатын талаптарды және мемлекеттік саясатты іске асырудағы рөлін нақты айқындап берді.
Енгізілген толықтыруларға сәйкес, этномәдени бірлестік деп Қазақстан этностарының дәстүрін, тілдері мен мәдениетін сақтау және дамыту саласындағы азаматтардың мүдделерін қанағаттандыру мақсатында құрылған коммерциялық емес ұйымдар танылады. Олар қоғамдық бірлестік, қоғамдық қор немесе қауымдастық (одақ) нысанындағы заңды тұлғалар бірлестігі ұйымдық-құқықтық нысанында әрекет ете алады. Бұдан бұлай мұндай ұйымдардың ресми атауында «этномәдени бірлестік» деген сөздер міндетті түрде қамтылуы тиіс. Сонымен қатар заңнамада бұл тіркесті тек аталған мақсатта құрылған бірлестіктердің ғана пайдалануына рұқсат берілетіні бекітілген.
Сондай-ақ заңда заңды тұлғалардың атауы мен нышандарына қатысты қатаң талап белгіленді. Этномәдени бірлестіктің толық және қысқартылған атаулары, сондай-ақ олардың бейнелік нышандары елімізде тіркелген мемлекеттік органдардың, саяси партиялардың немесе басқа да қоғамдық бірлестіктердің атаулары мен белгілерін толық немесе елеулі бөлігінде қайталамауға тиіс. Мұндай шектеулер заңнаманы бұзғаны үшін бұрын таратылған саяси партиялар мен ұйымдардың символикасына да тікелей қатысты болады.
Жаңа бапта этномәдени бірлестіктердің қоғамдағы негізгі миссиясы да нақты көрсетілген. Олар жалпыұлттық бірлік пен ынтымақтастықты, этносаралық және конфессияаралық келісім қағидаттарын нығайту бойынша мемлекеттік саясатты іске асыруға белсене қатысады. Өздерінің жарғылық мақсаттарына жету үшін бұл бірлестіктер өңірлерде коммуналдық мемлекеттік мекеме нысанында құрылған достық үйлерімен тығыз өзара іс-қимыл жасайтын болады. Енгізілген заңнамалық өзгерістер елдегі этносаралық татулықты нығайтуға және мәдени бірлестіктердің жұмысын ашық әрі заңды түрде жүргізуге бағытталған.
Фото ЖИ көмегімен әзірленді
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
