Ендігі жерде электрсамокаттардың тротуарлар мен жаяу жүргіншілер жолдарында қозғалуына толықтай тыйым салынды. Бұған дейін қолданылып келген — тротуарда сағатына 6 шақырымнан аспайтын жылдамдықпен жүруге мүмкіндік беретін жеңілдетілген ереже жойылды.
Самокат тізгіндегендер ең алдымен арнайы велосипед жолдары мен веложолақтарды пайдалануға міндетті. Ал бұл инфрақұрылым болмаған жағдайда, қозғалыс тек жолдың жүру бөлігінің оң жақ шетімен немесе жол жиегімен рұқсат етіледі.
Автокөліктермен қатар жолдың жүру бөлігіне шығу үшін пайдаланушылар біршама талаптарға сай болуы керек:
-
Жас және құжат шектеуі: Жүргізушінің жасы 18-ден асуы тиіс әрі кез келген санаттағы жүргізуші куәлігінің болуы міндетті.
-
Қауіпсіздік жабдықтары: Баста арнайы қорғаныс шлемі болуы шарт, ал тәуліктің қараңғы уақытында үстінде жарық қайтарғыш элементтердің болуы талап етіледі.
-
Өткел ережесі: Жаяу жүргіншілер өткелінен өткенде электрсамокаттан түсіп, оны жанында жаяу жетектеп өту қажет.
Оңтайландыру шаралары кикшерингтік (жалға беретін) компанияларға да тікелей қатысты. Енді жалға берілетін әрбір самокат сақтандырылып, арнайы тіркеу нөмірімен жабдықталуы тиіс. Сонымен қатар, сервистер техниканың жай-күйін, жылдамдығын және қайда жүргенін тұрақты бақылауда ұстауға міндеттелді. Жалға беретін платформалар пайдаланушының жасын және жүргізуші куәлігінің бар-жоғын жүйелі түрде тексереді. Куәлігі жоқ азаматтарға самокатты жалға алу мүмкіндігі автоматты түрде бұғатталады.
Ереже сақталуын полиция қызметкерлерімен қатар кикшерингтік жүйенің өзі де цифрлық деңгейде қадағалайды. Тыйым салынған аймақтарға кірген кезде самокат жылдамдығы автоматты түрде төмендеп, тоқтап қалады. Ережені елемеген самокат жүргізушілері әкімшілік жауапкершілікке тартылады. Бұл заңнамалық өзгерістердің басты мақсаты — жаяу жүргіншілер мен жол қозғалысына қатысушылардың барлығына қауіпсіз орта қалыптастыру.
