1-4 қараша аралығында Парижде ICAO Еуропа және Солтүстік Атлантика (ENAVSECG/10) арнайы авиациялық қауіпсіздік тобының оныншы отырысы өтуде.
Алқалы басқосуда азаматтық авиацияның өзгеріп отыратын қатерлеріне тұрақты түрде қарсы тұруға бағытталған мемлекеттердің проблемалары мен күш-жігері, авиациялық қауіпсіздік саласындағы соңғы технологиялық және инновациялық әзірлемелер қарастырылуда.
Кеңестің бірінші күні авиациялық қауіпсіздік жөніндегі арнайы топтың жаңа төрағасы мен оның орынбасарларының сайлауы өтті. Дауыс беруге Париждегі ICAO Еуропалық/Солтүстік Атлантикалық бюросына (EUR/NAT) мүше мемлекеттер қатысты.
Дауыс беру нәтижелері бойынша авиациялық қауіпсіздік жөніндегі арнайы топтың – ENAVSECG/10 вице-төрағаларының бірі болып «Қазақстанның авиациялық әкімшілігі» АҚ бас директорының орынбасары Дархан Еспотанов сайланды. Төраға болып Франциядан кандидат, екінші вице-төраға болып Латвиядан кандидат сайланды.
Төрағаның және вице-төрағалардың негізгі функцияларына авиациялық қауіпсіздік жөніндегі арнайы топтың жыл сайынғы кеңесін ұйымдастыру, авиациялық қауіпсіздік мәселелері бойынша өңір елдері арасындағы үйлестіру мен өзара іс-қимыл тобының алаңында қамтамасыз ету, ICAO-ның 17-ші қосымшасының стандарттары мен ұсынылатын практикасын жаңарту жөніндегі ұсынысты қарау және мақұлдау, авиациялық қауіпсіздікті дамытуға бағытталған есептерді жасау және жаңа бастамаларды әзірлеу, сондай-ақ авиациялық қауіпсіздік бойынша басқа да мәселелер кіреді.
Бұл лауазымға біздің мемлекетіміздің өкілін сайлау Қазақстанның халықаралық аренадағы мәртебесін арттыруға ықпал етеді және еліміздің Орталық Азия өңірінде көшбасшы ретінде авиациялық қауіпсіздік саласындағы позициясын нығайтуға септеседі.