Румынияның Бухарест қаласында Халықаралық электр байланысы одағының Өкілетті конференциясы (ХЭО ӨК-22) өтті. Өкілетті конференция ХЭО-ның жоғары шешім қабылдайтын органы болып табылады, оның шеңберінде Одақтың жалпы саясаты айқындалады, төрт жылдық стратегиялық және қаржылық жоспарлар қабылданады, сонымен қатар Ұйымның, Кеңеске мүше-мемлекеттердің жоғарғы басшылығы және Радиорегламентарлық комитет мүшелері сайланады (ӨК төрт жыл сайын өткізіледі).
2022 жылғы 3 қазанда сайлау қорытындысы бойынша С аймағынан Радиорегламентарлық комитет құрамына «Мемлекеттік радиожиілік қызметі» республикалық мемлекеттік кәсіпорнының директоры Ризат Нуршабеков сайланды (Ресей, Словакия және Өзбекстан өкілдерінен озды).
Тәуелсіз Қазақстанның тарихында бірінші рет еліміздің өкілі ХЭО-да осындай жоғары лауазымға ие болды. Атап айтқанда, Радиорегламентарлық комитет ХЭО-ның негізгі бөлімшелерінің бірі болып табылады және спутниктік жүйелер, ұялы байланыс және теледидар сияқты әртүрлі қолданыстағы және перспективалық технологияларды пайдалануды халықаралық реттеуде маңызды рөл атқарады. Осы орайда Қазақстанның Радиорегламентарлық комитетке мүше болуы еліміздің бұл ұйымдағы беделін арттырады.
Жалпы, Қазақстан өкілдері ХЭО сарапшы және басқарушы органдарының отырыстарына, Дүниежүзілік конференциялардың жұмысына және басқа да маңызды шараларға белсенді қатысады. Сонымен бірге, ХЭО-мен ынтымақтастық Ұйым қызметінің нәтижелерін және басқа елдердің әзірлемелерін электр байланысы саласын дамыту үшін пайдалануға, байланыс құралдарын дамытудың бірыңғай саясатын жоспарлауға және әзірлеуге қатысуға, жаңа телекоммуникациялық және ақпараттық технологияларды нарыққа шығару туралы шешімдер қабылдауға мүмкіндік береді.
Анықтама үшін: Радиорегламентарлық комитет Өкілетті конференцияда мүше мемлекеттер ұсынған кандидаттар арасынан сайланған 12 мүшеден тұрады.
Комитет мүшелері бес әкімшілік аймақтан сайланады: А аймағы – Америка (2 орын), В аймағы – Батыс Еуропа (2 орын), С аймағы – Шығыс Еуропа және БАД елдері (2 орын), D аймағы – Африка (3 орын), Е аймағы – Азия және Аустралия (3 орын).
