Бүгін Клермон-Ферранда мал шаруашылығын тұрақты дамытуға бағытталған 33-ші мал шаруашылығы саммиті ашылды. Саммитке Қазақстан құрметті қонақ ретінде шақырылды. Бұл елдің агроөнеркәсіптік кешен саласындағы жетістіктеріне халықаралық назардың артып келе жатқанын көрсетеді.
Ауыл шаруашылығы вице-министрі Аманғали Бердалиннің төрағалығымен делегация құрамына Әулиекөл тұқымы жөніндегі Республикалық палатаның, Қазақтың ақбас тұқымының Республикалық палатасының өкілдері, қой шаруашылықтарының, құс және балық өсіру кәсіпорындарының басшылары кірді.
Қазақстан саммитте қатысушыларына 30 қазақстандық компанияның 70-тен астам өнім атауын көрсете отырып, елдік стенд ұсынды. Стендке келушілер елдің ауылшаруашылық өнімдерінің алуан түрлілігімен танысып, оның дәмін тата алды.
«Біздің еліміз Орталық Азия өңірінде ауыл шаруашылығын дамыту бойынша көшбасшылардың бірі болып табылады. АӨК өнімдерінің жыл сайынғы экспорты 5 млрд доллардан асады. Біздің мақсатымыз — алдағы бес жылда оны 10 миллиард долларға жеткізу. Біз нарықтарды ашу бойынша белсенді жұмыс жүргізіп жатырмыз және жақын арада Еуропа елдеріне де өнім жеткізуші боламыз деп үміттенеміз», — деп атап өтті стендтің ашылуында Аманғали Бердалин.
В2В келіссөздер барысында делегация өкілдері бизнесті дамыту үшін пайдалы байланыстар орната алды, сондай-ақ француз инвесторларын елдің ауыл шаруашылығына инвестиция салу мүмкіндігін қарастыруға шақырды.
Барлық іс-шаралар Қазақстанның Франциядағы елшілігінің қолдауымен ұйымдастырылды.
Мал шаруашылығы саммиті тәжірибе алмасуға, инновациялық тәсілдерді талқылауға және тұрақты мал шаруашылығы саласындағы халықаралық ынтымақтастықты кеңейтуге арналған бірегей платформа болып табылады. 90 елден 115 мың келуші қатысады деп күтілуде, олар 70 тұқымның элиталық жануарларының көрмелерін тамашалай алады және саланың дамуына байланысты кең ауқымды тақырыптар бойынша конференцияларға қатыса алады.
АШМ баспасөз қызметі
