№11 бірмандаттық аудандық сайлау округі бойынша Жамбыл аудандық мәслихатының депутаттығына «Әділет» партиясынан ұсынылған кандидат Эльвира Бектыбайқызы Көшкінбаева өзінің 2026–2031 жылдарға арналған сайлауалды бағдарламасында ауыл тұрғындарының өмір сүру сапасын жақсартуға бағытталған тоғыз негізгі басымдықты айқындаған. Кандидаттың бағдарламалық құжатына сүйенсек, ол өз қызметінде әр тұрғынға әділ қарау, ауылдардың ерекшелігін ескеру және халықпен ашық байланыс орнату қағидаттарын негізге алады.
Эльвира Бектыбайқызы 1988 жылы Жамбыл облысында дүниеге келген, «Ақпараттық жүйелер» және «Кәсіптік оқыту» мамандықтары бойынша жоғары білім алған. Еңбек жолын 2008 жылы денсаулық сақтау саласында бастаған ол 2021–2025 жылдары тұрмыстық зорлық-зомбылық құрбандарына әлеуметтік көмек көрсету орталығында еңбек етсе, 2026 жылдың наурыз айынан бастап Жамбыл ауданы әкімдігінің жұмыспен қамту және әлеуметтік бағдарламалар бөліміне қарасты Отбасын қолдау орталығының директоры қызметін атқарып келеді. Үш бала тәрбиелеп отырған ана ретінде әрі әлеуметтік саланың маманы ретінде кандидат халықтың күнделікті тұрмыстық және әлеуметтік мәселелерімен жақсы таныс екенін алға тартады.
Бағдарламада ауыл инфрақұрылымын жаңғырту мәселесіне айрықша орын берілген. Атап айтқанда, кандидат Бесағаш ауылындағы көшелерді ағымдағы және орташа жөндеуден өткізуге, ауылішілік қоғамдық көліктің тұрақты жүруін қамтамасыз етуге және жол қауіпсіздігін күшейту үшін көшелерге бейнебақылау камераларын орнатуға ықпал етуді көздейді. Сонымен қатар, жеке тұрғын үйлердегі ауызсу қысымын реттеу, тозған инженерлік желілерді жаңарту, электр энергиясымен үздіксіз қамту және көшелерді жарықтандыру жұмыстарын кеңейту де негізгі міндеттер қатарында көрсетілген.
Ауыл экономикасын көтеру және тұрғындардың табысын арттыру бағытында Эльвира Көшкінбаева «Ауыл аманаты» бағдарламасы арқылы жеңілдетілген несие беру мүмкіндіктерін кеңейтуге, отбасылық кәсіпкерлік пен ауыл шаруашылығы кооперативтерін дамытуға жәрдемдесуді ұсынады. Бұған қоса, мемлекетке қайтарылған жерлер есебінен тұрғындарды жайылымдық алқаптармен қамтамасыз ету, ветеринариялық инфрақұрылымды жетілдіру және ауыл шаруашылығы өнімдерін өңдеу мен шағын бизнесті дамыту арқылы тұрақты жұмыс орындарын ашуға қолдау көрсету жоспарланған.
Әлеуметтік сала мен болашақ ұрпақ тәрбиесіне қатысты бастамалар да бағдарламаның өзегін құрайды. Кандидат мектептер мен балабақшалардың материалдық-техникалық базасын нығайтуды, білім беру ұйымдарына апаратын жолдардың қауіпсіздігін қамтамасыз етуді және шалғай елді мекендердегі ұялы байланыс пен интернет сапасын жақсартуды маңызды деп санайды. Сонымен бірге, қарт адамдар, балалы отбасылар мен мүгедектігі бар азаматтар үшін мемлекеттік әлеуметтік қызметтердің қолжетімділігін арттыру, ал жастарды «Жасыл ел» және «Жастар тәжірибесі» бағдарламалары арқылы жұмыспен қамтып, бұқаралық спортқа тарту көзделген.
Эльвира Көшкінбаеваның сайлауалды бағдарламасы Бесағаш ауылы мен округ аумағындағы өзекті инфрақұрылымдық, экономикалық және әлеуметтік түйткілдерді кезең-кезеңімен шешуге бағытталған ұсыныстарды қамтиды.
Дайындаған: «ID Corp» ЖШС.
Тапсырыс беруші: Э.Б. Көшкінбаева.
№11 бірмандаттық аудандық сайлау округі бойынша Жамбыл аудандық мәслихатының депутаттығына кандидаттың сайлауалды үгіт материалы республикалық бюджет қаражаты есебінен төленді.







