Жамбыл облысында жаңартылатын энергия көздерін пайдалану тарихы әлдеқашан, яғни 2013 жылдан бастау алады. Дәл сол жылы Тұрар Рысқұлов ауданына қарасты Қарақыстақ ауылдық округінің таулы шатқалында «Қарақыстақ» гидроэлектростанциясы салтанатты түрде іске қосылған болатын.
Аталмыш станцияның жобалық қуаты – 2,3 мегаватт. Бұл жобаны жүзеге асыру үшін 1 миллиард 7,9 миллион теңге инвестиция бағытталды. 2013 жылдың 14 маусымында пайдалануға берілген гидростанция содан бері табиғи су ағынының қуатын үздіксіз түрде электр энергиясына айналдырып келеді.
Станция директоры Нұрдос Қалдыбалиннің айтуынша, «Қарақыстақты» өңірдегі жасыл энергетика саласының алғашқы қарлығаштарының бірі деп толық айтуға болады.
– Әлемнің дамыған елдері табиғи қуат көздері – күн, жел және су энергиясын пайдалану арқылы тұрақты экономика құруға көшіп жатыр. Қазақстан да 2013 жылдан бастап жасыл экономика бағытын белсенді түрде дамыта бастады. Ал «Қарақыстақ» гидроэлектростанциясы осы бастаманың өңіріміздегі алғашқы пионерлерінің бірі болды, – дейді Нұрдос Қалдыбалин.
Бүгінгі таңда бұл шағын кәсіпорында 15 адам еңбек етуде. Мұнда өндірілетін электр қуаты тікелей «KEGOC» бірыңғай электр жүйесіне беріледі. Осылайша, алғашында жергілікті шағын жоба болып басталған кішкене гидростанция бүгінде еліміздің біртұтас энергетикалық жүйесінің ажырамас бөлшегіне айналып отыр.
Қазақстан Республикасының «Жасыл экономикаға» көшу тұжырымдамасы аясында жаңартылатын энергия көздерін дамыту жұмыстары кезең-кезеңімен жалғасуда. Мемлекет тарапынан көрсетіліп жатқан қолдаудың, сәтті тартылған инвестициялық жобалардың және табиғи әлеуетті тиімді пайдаланудың арқасында елдің жалпы энергожүйесіндегі экологиялық таза энергия үлесі біртіндеп артып келеді.
Жамбыл облысының бұл бағыттағы тәжірибесі – айқын мысал. Кезінде жалғыз «Қарақыстақ» ГЭС-інен бастау алған бұл үрдіс бүгінде ондаған күн, жел және су электр стансаларын біріктірген қуатты әрі дамыған энергетикалық жүйеге ұласты.
Алдағы уақытта баламалы энергетика нысандарының санын арттыру өңірдің энергетикалық әлеуетін нығайтып қана қоймай, экономиканың жаңа бағыттарын дамытуға, инвестиция тартып, қоршаған ортаның тұрақтылығын қамтамасыз етуге зор үлес қосады.
«Қарақыстақ» гидроэлектростанциясы осы жолдағы алғашқы қадамдардың бірі болып, бүгінде Жамбыл облысының «жасыл» энергетикаға біртіндеп көшуінің айқын үлгісіне айналып отыр.
